小妹早排同男友去旺角樓上咖啡店嘆咖啡，睇到關注性工作者組織紫藤出嗰本免費性愛雜誌《性愛FUN》，佢同坊間嘅鹹書唔同，呢本雜誌主力介紹性知識，其中有一篇講情慾食療，介紹一碗壯陽粥，聲稱可以增強性能力。材料包括：蓮子10克、銀耳15克、山藥20克。做法係：加水燉煮成粥，食前加生雞蛋一隻，攪散跟粥一齊食。
男友睇完之後，話要去藥材舖執番劑壯陽粥試吓，但我就唔係咁放心，冇效唔緊要，最驚食咗適得其反，都係問吓中醫師好啲。
要長期食才有效
中醫師公會會長關之義話，該碗壯陽粥有蓮子、生雞蛋，有健脾益腎嘅功效，簡單講係可以強精，加強男人嘅生育能力，而唔係增強性能力，仲要係以年計咁長期食先有效，「如果你以為食咗碗粥好似食『偉哥』咁，食到『發發』聲，肯定唔係囉。」
關之義又話，碗粥唔會食壞人，但又唔係個個啱食，如果本身脾胃虛弱，胃納唔好嘅人，食得多蓮子會好滯；肺氣虛嘅人唔適宜食咁多銀耳，「食之前問吓中醫師好啲。」
逢周一至周四刊出