-第六回-
在《野蠻奶奶大戰戈師奶》中，艾威飾演胡杏兒的戇直舅父言有信，雖然劇中老婆因炒燶股票走佬，但艾威最後仍能原諒對方，是個百分百好男人。艾威表示劇中加入不少自己的演繹方式，如老婆走佬時邊喊邊訴苦，營造搞笑效果，連跟他做對手戲的胡杏兒都忍俊不禁，艾威說：「我覺得自己都幾成功。」
撰文：楊潔雯
攝影：陳偉權
場地提供：ThaiLemongrass
雖然《野蠻奶奶大戰戈師奶》的主角是汪明荃、胡杏兒和黃宗澤，但身為綠葉的艾威亦不容忽視。劇中飾演胡杏兒戇直舅父言有信的艾威，日前接受訪問時說：「呢個舅父同外甥女感情好好，關係好密切，仲係一個好戇直嘅差人，心地好善良，好似佢老婆（汪琳飾演）炒股票走佬，再返轉頭都可以即刻原諒佢。」
劇中言有信任職警察，劇情不時會講到他無意中引導畢平凡（許紹雄飾）追查誰是Fiona，艾威說：「畢平凡出獄之後，不停追查當年害佢坐監嘅Fiona下落，因為我係差人，所以我會幫手追查呢單案。呢個舅父雖然篇幅唔多，但係我盡量將喜劇感套用喺呢套劇入面。」
自度喊戲添笑料
艾威刻意為《野》劇幾場戲加入喜劇元素，效果令他自己非常滿意，他說：「我記得有一場戲係講我喺差館要鬧黃宗澤，因為佢搞到杏兒冇差人做，本來個劇本講我就咁鬧佢，但係我同導演商量改一改，我喊住鬧黃宗澤，一邊鬧一邊喊，配合呢套喜劇，營造搞笑氣氛。又有一場戲我向杏兒訴苦，話我老婆炒股票輸錢仲走佬，本來只係話我訴苦，但係我加入少少自己演繹方法，一邊喊一邊訴苦，仲要做到好搞笑，我記得當時同我做對手戲嘅杏兒都忍唔住想笑，所以我覺得自己都幾成功。」
讚杏兒演技進步
艾威在劇中與外甥女胡杏兒對手戲最多，而杏兒入行以來，艾威經常與她合作，覺得這些年來杏兒演技方面大有進步，艾威說：「我對上一套劇《太極》又係同胡杏兒拍，我係做佢仇人，之後就做佢舅父，見到佢今次在《野蠻奶奶》入面發揮得好好，不斷進步，係TVB一個好有喜劇感嘅演員，個人聰明，諗嘢好快，今次做得好出色。」
胡杏兒擔正可以盡情發揮，但艾威覺得配角也不可忽視，又讚扮演同性戀者的郭政鴻演出出色，他說：「我覺得郭政鴻個角色都幾特別，我知道郭政鴻知道要演呢個角色嗰陣，都研究咗好耐，拍嗰陣佢仲出好多私伙，令到個角色更加突出。」
搶先爆：情敵埋身 心情煩躁
今晚播出的第14集《野蠻奶奶大戰戈師奶》，講述芷喬（楊秀惠飾）借故帶新工作資料給戈德（黃宗澤飾）參考，忽然跑到戈德家中，令麗敏（胡杏兒飾）心情煩躁，被奶奶O姐（汪明荃飾）狂寸。
戈德在投資公司工作，O姐擔心他像其父一樣惹桃花及走火入魔，於是向芷喬求助，原來芷喬是戈德初戀情人，當年O姐為令芷喬離開兒子而供她到美國讀書，一手拆散鴛鴦。為了戈德，O姐甚至放下尊嚴找畢平凡（許紹雄飾）道歉，希望對方出手相救，又指自己手上戴着他送的水晶手鏈，令自己可以心平氣和，畢平凡聞言頓覺O姐與眾不同，對她大為欣賞。
