無綫賀年特備節目《東華愛心競技同樂日》噚日喺將軍澳電視廣播城錄影，節目會喺年初二下午播出，藝員分別聯同16隊唔同機構嘅隊伍玩遊戲一較高下，徐淑敏穿上運動裝，身形同上圍明顯縮水，佢話：「因為之前拍完旅遊節目，太多人話我肥，夜晚個肚打鼓都唔敢食嘢，體重現時低過100。」
呂慧儀雞手鴨腳
徐淑敏夥拍房協樓管先鋒隊三位組員玩四人三足行石春橋遊戲，最後要合力將乒乓球投到桶入面，徐淑敏右邊係一個男組員，初時佢哋都保持距離，但徐淑敏踏上石春橋後，顯得十分痛楚兼面容扭曲，之後即刻主動捉緊男方膊頭借力，認真醒目，雖然佢哋好快完成比賽，可惜投球唔準，最後未能勝出，司儀安德尊仲笑住話：「男組員淨係掛住望徐淑敏咪入唔到球囉。」終於由鄧上文率領嘅隊伍成功出線得獎。
之後輪到另一環節，參賽者合力傳遞大利是封，其中呂慧儀被委派最重要崗位，以長筷子夾大利是，但係佢雞手鴨腳，彎腰時仲露出腰肢，好鬼論盡。