「李麗珊話養一個細路要400萬！」呢句咁爆嘅說話係出自他們——LeoBurnett的手筆。
想成功宣傳？唔出位，唔夠Noisy，唔搞笑，唔引人注意，都好難令善忘的香港人望一眼而入腦。一向出位的楊老闆，今次宣傳DelayNoMall全面開幕，就搵來一向創意十足的LeoBurnett搞搞新意思。大玩今期流行的街頭宣傳之餘，更搵人馬路攤屍。咁出位的行為，又再次挑戰警方尺度。其實引起公眾注意，又令大家開心，齊齊癲吓、玩吓，又有乜相干呢？
記者：許維雅
攝影：王文忠
DelayNoMall宣傳出位4大招
一）馬路中心瞓覺！
5位模特兒於中環置地廣場旁的T字位馬路中心瞓覺，立刻引得路過的人不停舉機拍照，細聲討論「咁得意嘅？」
二）當街野餐
一到綠燈，Granit一個箭步衝出去負責鋪地布準備野餐。
三）鬧市行Catwalk
8個模特兒於路中心行Catwalk，又真係幾靚幾壯觀。
四）行人區玩遊戲
玩完波玩扭扭樂，大家都唔明點解佢哋會喺度玩，但一樣照睇，最後玩到終於有差人殺到驅趕。
途人狂影相
吸引到有幾多人睇？今次宣傳手法Impact有幾大？睇吓有幾多人揸相機影相就知佢哋有幾大興趣。
自由行叔叔一班人衝埋去近距離影亦有。
中環瞓馬路 挑戰尺度
G.O.D.向來出位，一單「拾肆K」新聞，街知巷聞。今次為宣傳DelayNoMall全面開幕，繼續出位，繼續測試公眾道德界線。先在下午2時，找來5位模特兒於中環畢打街及皇后大道中交界路中心開餐、瞓覺；再於下午5時，搵8位模特兒於銅鑼灣馬路中心行Catwalk，緊接再到行人專用區玩遊戲。整個過程，無論衣着及舉動，都吸引幾百人圍觀，成功製造話題，但同樣惹得交通督導員大鬧：「唔可以瞓馬路中心！」警察亦鬧佢哋阻街。街頭互動宣傳文化夠創新，挑戰政府尺度冇有怕，這出位宣傳策略跟DelayNoMall的創新形象的確十分啱嘴形。
互動街頭宣傳係大趨勢
今次度出咁搞鬼、大膽宣傳手法的幕後班底，原來係已經擁有73年歷史，1935年成立的李奧貝納廣告有限公司（LeoBurnett）。能成為HK4As廣告公司，更係全球十大之一，得獎固然無數，大客自然多籮籮，好似CSL、恒生銀行、及宜家傢俬等。副品牌總監Maurice：「我哋設計今次宣傳，先想配合DelayNoMall大膽創新的形象，再希望可以帶出『想做就做，唔好再等』的訊息。有時行行吓街，真係會想瞓覺，會想玩、想食，諗到就要即刻做。選中環當然夠人多，馬路中心更可以引到人注意，上班一族灰灰黑黑的西裝，令模特兒色彩繽紛的衣着更突出。揀銅鑼灣就想近一點舖頭。我哋會盡量配合番個Mall的主題，好似搵黑人紋身模特兒介紹有紋身Bar、叫模特兒瞓街表達Mall有獨立睡床給人客瞓覺等等，令人知道DelayNoMall係既玩得又Fashion的新商場。」Maurice更表示互動街頭宣傳係全世界的大趨勢，他最印象深刻的宣傳就係adidas於日本，將兩棟大廈髹成一個球場，然後吊兩個真人上去踢波，都係互動街頭宣傳之一。
街頭誇張式宣傳其實在日本好普遍，上YouTube就搵到adidas搵人着到古靈精怪喺街頭表現，吸引途人注意。
著名廣告人PaulChan
「你一講佢哋嘅Idea，即刻令我諗起睇過一單外國宣傳新酒店的片段。佢哋搵一個靚女模特兒着住浴袍，周圍喺街度問人間酒店喺邊，令人意識到間新酒店已經開咗。呢類型嘅宣傳手法可以好成功，但引起話題嘅同時，就必須要真係交待到你想宣傳啲乜。所以設計街頭做啲乜時，一定要好小心。」
街訪：好正，但唔知做乜！
Max
「咁樣玩法實有人睇，咁出位嘅宣傳都一定會令人留意，我覺得好過賣雜誌、燈箱嘅平面廣告！」
Jamine
「OK新穎同搞笑呀，佢哋着得咁靚咁出位，好引人注意，我覺得幾成功做到宣傳！」
Annika
「好搞笑！喺英國都從來未見過咁嘅宣傳。雖然唔知佢哋Sell乜，但覺得佢哋嘅宣傳有效。」
Jerry
「夠晒出位！我都睇咗幾分鐘佢哋搞乜鬼！但時間太短，如果揀綠燈時間長啲嘅地方會好啲。」
Binky
「好鍾意！可以咁近距離睇佢哋行Catwalk。我會因為佢哋啲宣傳手法，去嗰間舖睇吓。」
