非洲國家隊噚日開幕，國際足協會長白禮達日前就突然以大佬嘅口脗要求非洲足協，考慮將非國盃由年初改至6、7月舉行，話咁樣先至同世界接軌！炎夏喺非洲踢波？咁樣同亁煎班非洲球員有乜分別？
2010非國盃喺安哥拉舉行，嗰度位處非洲南部，夏天平均氣溫尚算可以，不過換轉喺赤道以上嘅北非國家主辦嘅話，就分分鐘「熱」出人命嘞！呢個建議仲有一個問題，每兩年舉辦一次嘅非國盃，隔一屆就會同世界盃撞期，唔知「白老大」有冇諗過呢？
與非協會長積怨深
「白老大」梗係唔會亂咁講啦！佢咁做係想搞亂個party就真。記得2010世界盃海報亮相當日，佢就講話海報中人係伊度奧，結果搞到其他非洲足協人士大為不滿，今次亦擺明係想搞分化！
非洲足協會長哈亞圖聽過「改期論」後面色一沉，兩條孖潤腸一震：「我喺度一日，非國盃唔會改期！」佢用意係希望透過2010非國盃備戰世界盃。不過「白老大」就話班球員打完非國盃返歐洲打球會比賽，最後再參加世界盃實謝晒！
兩位老人家都咁高咁大，何必嗌交呢？原來成件事係兩人多年積怨所致。02年「白老大」爭取連任國際足協會長，來自喀麥隆嘅哈亞圖就係主要對手。最後前者提出2010世界盃由非洲國家爭辦，一嘢就掠走對方好多非洲票數，結果順利連任。
討好歐洲豪門聯盟
大家都知「白老大」一向好唔妥歐洲豪門，今次改期論變相為對方出計仔，解決非國盃捲走非洲球星嘅問題。原來，咁做同國際足協同歐洲足協本月成功說服歐洲豪門聯盟G14，喺下月初「埋堆」一齊食大茶飯有關。不過，第日班非洲球星暑假打完非國盃中晒暑嘅話，到時就真係多得白禮達唔少！