市道好景，可以買新樓又或將間屋重新裝修，不過最麻煩是一時間不知道天下還有那處可暫時容身。近年興起很多服務式住宅，好多住客都讚方便又抵住，只要執好包袱即刻可以入住，仲有專人上門執屋打掃，短租逐月計平過住酒店。其實最新嘅服務式住宅已經不止要求方便，仲提供貼心服務和內觀設計，令你住到唔捨得走！
記者：葉雪芯
攝影：周旭文、葉雪芯
Model：Ceci、Michael@stagemodel
真實個案
Ben：好有屋企feel
住在位於北角服務式住宅「壹一寓」約1個月的Ben，大讚這類暫住式住宅好方便：「因為屋企要裝修，所以呢幾個月就要搵呢類單位住一排。最好係全部家電、傢俬都包晒，又有女傭上門換毛巾、打掃，真係執埋行李就搬得入去住。而且，要搵一啲可以俾我短租半年的單位根本好難，出面嘅單位至少要租一年或以上，碰到專揀租客嘅業主時，分分鐘我收埋樓都租唔到。」
以前要短住，通常只會租酒店或較次檔嘅賓館，Ben解釋，酒店一來比較貴，二來他要有家的感覺：「住酒店，一打開門就係床，格局始終無住家feel；但這類住宅好處係似屋企，雖然面積只得450呎，月租$11,000，但可以有一個細廳，一間睡房、小廚房，即使想煮飯仔都得。」
抵過住酒店
Ben話計過條數，住服務式住宅始終抵過酒店。現時不少酒店為增加客路，會推出月租或長租計劃，以一般三、四星級酒店計，月租約一萬二千至三、四萬蚊不等，當中不少費用都要另計，而且面積只有二百至三百呎。但大部份的服務式住宅月租約由一萬至二萬，很多已包水電、上網費、洗衣、打掃服務等。面積方面，由三百至四、五百呎都有。
短租都有淡旺季
要入住服務式住宅，都有淡旺季之分，一般長假期和農曆新年前後都比較旺，部份屋苑更會爆滿。美聯物業九龍區高級分行經理HenryTsang指出，一般服務式住宅住客都是以歐美國家人士和日韓人為主，多數是單身人士，或者倆小口，本地住客相對較少。「每年到長假期和農曆新年，就特別多由外國返港探親友的住客短住，但對養寵物的家庭就唔適合，因為幾乎全部屋苑都唔容許養寵物，所以有寵物嘅朋友就要送隻寶貝去寵物酒店暫住喇。」
加設熱帶雨林休息室
要數香港最大的服務式住宅集團，可算是Shama，最近又在尖沙嘴開新盤，在一幢商住大廈中佔了8層，分別有單間式和兩房單位，最細單位都有320呎。新Shama服務住宅賣點係15樓天台的空中花園，包括熱帶雨林、休息室、燒烤和Wi-Fi等設備，十足會所一樣。每個單位不止裝修靚，部份還有設計主題，配備小廚房和影音設施包括plasma、DVD機、上網及i-Pod插座等。另外，又有24小時保安、每層都有常駐管家，提供24小時全天候服務。此外，每天有女傭打掃、每周兩次更換毛巾及床單、專業洗熨及亁洗、免費雜誌、自助洗衣設備、playstation及專車接送來往機場等。
尖沙嘴Shama（31008555）
地址：尖沙嘴彌敦道74-78號
面積：320-1,075呎
月租：$13,800-$48,000
其他服務式住宅
studiostudio
約$6,000-$11,000
（包上網、洗衣及清潔等）150-320呎
灣仔駱克道502號（28058000）
拔萃豪庭
約$15,370-$25,400
（包水電、清潔及上網）400-651呎
九龍佐敦長樂街19號（61091111）
木棉花
約$16,000-$24,000
（包水煤、上網及清潔等）459-505呎
灣仔港灣道28號灣景中心A座（25860409）
338Apartment
約$22,000-$26,500
（包水電煤、清潔和洗衣）576-695呎
中環皇后大道中338號（23386388）
個個讚好
劉先生
服務式住宅租金係貴過租屋，但慳番女傭費呀，好過住酒店人流較複雜。
May
我舊年住過服務式住宅，我會先揀地點，最緊要交通方便，同住得舒服。
Donna
我由美國嚟香港，𠵱家住緊服務式住宅，貪佢設備足，租金包晒所有費用。
Davidson
酒店太coolfeeling，serviceapartment就似屋企，仲可以開party。
Akimi
我由日本來港住８個月，呢類住宅好有屋企感覺，抵過酒店好多。
Crystal
我曾經想過入住，但因有養狗，所以唔住得。佢價錢唔算平，不過算方便。
