第一上海（227）11月以來，堅守兩蚊嘅三底支持，個市越跌，第一上海越值得憧憬。恒指同期倒水咁倒，上星期兼質穿埋三角底部支持，但第一上海硬淨到爆，穩守兩蚊樓上。原因好簡單，個市越跌，市場就越憧憬港股直通車就快開通，第一上海係中資背景，點都有先機優勢。
再講，第一上海單係07年上半年度（6月底止），旗下嘅證券、經紀及融資業務，已經斷兩倍咁高速增長。集團單係上半年度純利2.44億銀，已經超過06年度純利2.3億銀。而呢期港股雖跌，但成交keep住旺場，幾乎日日上千億銀。第一上海嘅證券相關業務，繼續肥仔水，07年度業績，應該靚爆。大行維持對第一上海07年度預測，純利只係去到3.6億銀，PE不過8字頭，博翻半番到3.34元，PE都係12倍。直通車一到站，第一上海唔會再有呢個筍價。
金源米業息高抵買
金源米業（677）最新P/B得0.8倍，呢期市場炒通脹，唔少食品股，包括超大（682），P/B已經上到兩倍，另一隻中國綠色（904），P/B更加去到4倍，金源P/B都未上到1倍，抵炒。再講，呢期大市唔掂檔，高息股吃香。金源係高息一族，年年穩定派息，預期息率4厘樓上，吸引過紅簿仔好多。金源呢期整固，股價落到250日線有支持，係咁易博P/B上番1倍，金源現價（0.62元）要升20%。
