距離北京奧運開幕仲有200日，之前俾人話搞唔起奧運氣氛嘅香港特區政府，噚日喺海洋公園舉行咗個迎奧運倒數活動，唐唐同德成局長親自主禮。唐唐致辭時仲話，嚟緊嘅奧運馬術賽一定唔可以有負國家重託。咁點先叫做冇負國家重託呢？德成局長嘅民政事務局前日無厘頭出咗段稿，似乎露咗少少玄機。
前日晏晝民政局無啦啦出稿，話特區政府正全力籌辦今年8月同9月嘅奧運同殘奧馬術賽，作為奧運協辦城市，香港有責任確保奧運活動安全、和平同順利進行，仲話奧運會係莊嚴嘅體育盛事，不應被利用作任何政治或宗教宣傳，特區政府唔歡迎任何人士喺香港破壞奧運嘅莊嚴，或者干預奧運活動順利進行咁話。
泛民冇計劃搞搞震
政府咁講，可謂呼應外交部發言人姜瑜上個星期例行記者會上，話中方反對奧運政治化，仲話有組織基於「不可告人政治目的」炒作奧運議題，企圖詆毀中國形象嘅講法。特區政府咁緊跟中央，唔知係咪又係德成局長嘅功勞呢？
到噚日唐唐又以領導人口脗，話馬術賽籌備工作已經進入最後階段，全體要善用餘下200日確保一切就緒，舉辦一屆出色嘅馬術賽事。睇嚟特區政府今次真係不容有失，中央政府固然極其重視北京奧運要搞得好好睇睇，展示大國崛起嘅盛世風範，就算豆腐膶咁細嘅香港，屆時都唔可以有任何破壞氣氛嘅事發生。據八方了解，中方早已向外界收風，睇吓有邊啲團體想喺奧運聖火傳送到香港時搞搞震，及早防範。
不過，八方問過泛民中人，佢哋知道將奧運同政治扯上關係係中共禁忌，眼見馬丁早前篇文都搞出咁大風波，點會再次自踩地雷？所以冇乜計劃趁奧運搞遊行示威。至於法輪功，據講雖然唔排除喺馬術賽期間喺場外擺檔，但就話唔打算踩入場內搞嘢。
至於噚日嗰一個鐘嘅倒數活動，實在冇乜新意，都係搵歌星獻唱吓咁，較精采嘅都只係由海洋公園主席盛智文再次粉墨扮嘢出場，但佢今勻唔扮福娃扮青蛙，仲拉埋陳佐洱位千金、海洋公園保育基金主席陳晴落水扮蝴蝶，話宣揚保育訊息喎。咁都同奧運有關？有，因為今屆奧運其中一個口號係綠色奧運吖嘛。總之，嚟緊乜都會同奧運有關㗎啦。