正所謂「窮不與富敵，富不與官爭」，好似前中國女首富張茵咁，之前因為「勞動合同法」動真氣，喺香港大罵內地官員新法例對商家唔公平。張茵雖然冇有怕，但投資者就一額汗，擔心佢得罪阿爺，到時公司發展仲有冇咁順利就好難講，大家見唔對路紛紛散水。
出通告冲喜失敗
自從張茵喺舊年12月18日大鬧勞動法，過咗兩日，玖龍紙業（2689）嘅股價咁啱得咁蹺開始係咁跌，至今累跌26%。上個禮拜五，玖紙出咗份澄清通告，話關注到投資及分析師對佢哋新開發嘅產品，同上游擴充計劃「甚為熱衷」，所以出個通告講吓進度，收購兩家紙廠估計未來兩年半投資16億銀，做液體包裝紙又話初步計都要揼14億銀。雖然有30億投資大計，有冇用要睇今日股價表現。
出通告唔知有冇用，唔緊要，最緊要有水，雖然女首富之位俾碧桂園（2007）太子女楊惠妍搶咗，但唔代表張茵冇水，基金散水咪自己泵漲個股價囉，自1月9日開始，張茵連續五度出手增持玖紙（見表），涉及嘅資金有成1.26億銀，不過，似乎自救乏力，股價越托越跌。惟有賴美國次按風暴，港股被美股拖累，張茵憑個人力量，又點鬥得過大圍走勢？
以上個禮拜五收市價14蚊計，玖紙市值得番600億，比過去半年高位26.25銀，公司大縮水超過一半。托完市、出完公告，唔知佢仲有乜法寶自救呢？
電郵：mailto:[email protected]