專欄作家兼社工嘅邵家臻本新書《天水‧違》出咗兩個零禮拜，佢噚日請咗浸大社工系助理教授余偉錦同天水圍助人自助聯會主席林君偉兩位天水圍居民做嘉賓，舉行咗個分享會。邵家臻劈頭就話，煲呔早前提出一系列打救天水圍嘅措施，但就似做總結多啲，因為要做嘅嘢嗰班議員、政黨、財團等等一早已做咗，煲呔呢鋪真係「愛得太遲」兼用錯晒力。
余偉錦博士就話，佢99年搬入嘉湖山莊，嗰陣人人都叫嗰度做「綜援山莊」，而且自稱「白供主人」，因為嗰時樓市跌到慘不忍睹，供樓供到儍。佢仲話，天水圍其實係需要一個長久嘅解決方案，而唔係政府有事就嚟關注吓就算，「愛得堅持」先係正路。