被指為「政治分贓」嘅副局長、局長政治助理制度，煲呔為免明目張膽同自己友分餅仔，噚日透過御用智囊智經研究中心，喺陽明山莊會所舉行兩場政治體制發展研討會，呢個「分唇」名為研討會，實為煲呔獵頭大會，禮賓府心戰室核心劉細良、何安達、陳德霖負責「選美」，智經主席胡定旭、高官林D9都有到場幫眼昅真啲。
60人出席揀蟀大會
陽明山莊出名係富豪「鐵竇」，江湖傳聞入面好多嘢玩，選擇喺度舉行獵頭大會，而且要喺地牢舉行，真係既神秘又令人諸多聯想。八方聽聞噚日約有60人獲邀出席，多數係智庫成員、專業人士同政黨新秀，學者李彭廣獲邀發言，新力量網絡主席史泰祖、民建聯副主席蘇錦樑都有現身，幫煲呔助選嘅游淑儀「魷魚」亦有蒲頭，可見煲呔口味不拘一格。
副局長、政治助理月薪十幾萬元，對好多人嚟講甚為吸引，八方噚日見到好多青年才俊、貌似才俊者出入，不過人人三緘其口唔肯多講「獵頭」情況，有個肥仔大話西遊，聲稱「嚟食餐飯啫。」胡定旭貌似忠良實質蠱惑，會後扮大方接受記者訪問，原來係調虎離山引開記者，方便參加者快閃即撇。佢話噚日主要係聽取各界別人士對政制發展意見，至於係咪獵頭揀蟀，佢顧左右而言他答非所問。
首批蟀仔4月前埋位
有人同八方講，與會者者噚日要分組討論博表現，標青者過咗噚日一關，仲要等老細發落，估計有三分一人可晉級有機會面試，一切順利嘅話，首批副局長、政治助理大約今年3、4月可埋位。據講民建聯、自由黨等「執政聯盟」已俾咗推薦名單煲呔，而名單上嘅名字同之前傳出嘅分別頗大，隨時有驚喜，而政黨揀蟀推薦都幾審慎，名單以政治助理為主，副局長人選唔多。
政府早前獲立法會通過撥款開設24個副局長同政治助理職位，有人同八方分析，煲呔挑選新一屆政府局長時好挑剔，呢次獵頭都唔會輕率，估計呢24個人未必會同時齊人上任，噚日表面上人多勢眾，恐怕相當多人係掩人耳目嘅「煙幕」，真命天子少之又少，加上煲呔已有部份心水人選，所謂獵頭大會，可能只係俾躍躍欲試自信心爆棚者走過場嘅派對，雀屏中選者隨時已經暗渡陳倉，「埋周」了！