立法會議員通過無約束力動議，敦促特區政府動議通脹，採取措施照顧民生。呢啲動議，勝在講咗等於冇講，浪費一輪議員發言時間之外，以後冇人記得，即使係發言議員嘅選民，亦唔會記得。議員講通脹，要政府做吓嘢，政府千祈唔好。做乜嘢呀？特區政府及以前港英政府自採用聯繫滙率之後，死不願改，早已放棄咗對抗通脹嘅主動權，面對通脹，完全無計可施。我哋香港嘅通脹，由北京與華盛頓決定，曾特首曾財政司長冇話事權。北京決定供港之糧食價格，華盛頓決定香港嘅利率。
華盛頓其實更加有影響力，美元減息救市，香港不能不跟。我哋樓價上升，通脹升溫之時，本應加息，卻被迫減息，對通脹有如火上加油。假如優惠利率再減到六厘二五或六厘半，按揭利率P減三就係三厘二五或三厘半，預測今年通脹起碼三厘半，於是以實際利率計，按揭利率等於零，借錢買樓有着數，提早還款就係笨蛋。吃虧嘅係銀行，而銀行甘願做一啲冇realreturn嘅按揭貸款，拜聯繫滙率之賜也。
北京表面上有管制、限制糧食價格之能力，益吓香港，實際上未必做到。一位貨櫃車公司老闆對左丁山講，內地嚴禁抬價，加油站嘅柴油公價每公升售人民幣5.28元，但如果公司用掛賬方式付款，開個戶口嘅話，柴油價賣6.50人民幣，貴23%。實行起嚟，有乜分別呀，貨櫃車老闆話：「分別大到極。我哋啲司機揸車入油站走掛賬通道，好快就入滿一缸油四百公升。其他冇掛賬戶口嘅司機就走官價通道，通道盡頭只得一個pump，一枝柴油槍，想入油呀，排隊個幾鐘頭啦，排到入油之時，只准入一百公升，如果司機要入滿油，要排四次隊，用五六個鐘頭。唔使做生意咯！」老闆W話阿爺雷厲風行話要打擊通脹，但行政命令不是市場規律，睇吓加油站就知。如此說來，中央口口聲聲話保證供應不可盡信，但更不可信嘅就係香港特區政府有能力阻止通脹。