首富李超人旗下樓盤質素與眾不同中外聞名，香港、北京小業主都見識過，原來遠在加拿大都有小業主牙痛咁聲。據加拿大《星島日報》報道，由超人喺88年牽頭發展嘅溫哥華「萬博豪園」計劃，部份單位出現外牆漏水問題，小業主索償訴訟糾纏多年冇結果，十分頭痛。
報道訪問咗一個港人業主Dave，佢93年買入單位打算退休長住，點知因為漏水問題，業主會決定同發展商打官司，多年來已支出訟費逾1,100萬港元，最近業主收到通知，要再夾錢打官司同維修，平均每戶要科水逾3.5萬港元律師費同約91萬港元維修費，條數十分襟計。
溫哥華樓市近年好景，呢位業主卻話漏水單位冇人吼，佢十幾年前用198萬港元買入單位，舊年以410萬港元放售，兩個月冇人問津，𠵱家單位估值跌至約280萬港元，就算成功甩手，扣番歷年畀出嘅律師費同維修費，最多打和，隨時變負資產。