有時手機喺唔適當時候響起，真係好尷尬，但只要有急智就唔怕。港大為爭取尖子入讀，噚日朝喺陸佑堂舉行講座，校長徐立之到場做生招牌，台下學生、家長見到校長唔敢傾偈，屏息靜氣等佢開腔，點知校長未講嘢，佢部手機突然響起，大家暗忖，邊個急call校長呢？
徐立之雖然見慣大場面，但呢個失魂call都令佢窒一窒，佢冇接聽即刻熄機，然後若無其事咁話，每次重要關頭，校務委員會主席馮國經就會電話到，佢好似驚大家唔信，特登望一望部手機，強調真係馮主席來電。原來校長咁風趣，引得哄堂大笑，至於係咪真係馮國經急call，無所謂啦！