小童群益會搞咗個10大中國新聞網上選舉，總共有4,000幾個中學生投票，「嫦娥一號」奔月新聞榮登榜首，亞軍就係盈盈樂樂來港慶回歸10年。不過，中國有兩個城市被選為全球10大污染城市、中國製玩具質素問題都榜上有名，證明香港中學生唔係獨沽一味睇正面新聞。
調查又發現，有近三成中學生話會「積極留意」中國新聞，有超過半數就話會「間中留意」。小童群益會指「間中留意」已經好唔錯，起碼唔係冷感。佢哋又建議中學整個「當代中國發展」新課程，唔好淨係要學生背年份，仲要從歷史事件中思考。八方舉腳贊成中學生要思考多啲當代歷史事件，咁將來有人話文革係極端民主，或者提出坦克轆豬論，啲中學生都識得分辨黑白是非。