冇中方祝福，都唔使旨意選到人大。可能有啲人深知自己一定冇機會當選港區人大，但又想過吓手癮，所以專程攞張表格留念，好似今屆明明有63人攞表，但最終只有50人交表，換言之有13張報名表「流落民間」。
人大選舉會議主席團發言人李祖澤都留意到呢點，噚日喺記者會度笑笑口話可能有啲香港人好奇，專登攞份表格返屋企留念都未定。另一個可能性，當然係啲人根本攞唔夠10個參選提名，所以想報都冇得報。
兩座談會撞期爭人
雖然今屆嘅參選人數比預期少，但唔少團體都繼續搞候選人政綱座談會，好似民建聯同公共專業聯盟搞嘅都撞正喺聽晚舉行。據聞公共專業聯盟特別為此延遲開會時間，仲改喺民建聯總部附近嘅北角城市花園酒店舉行，方便候選人連走兩場，費事被民建聯搶晒啲候選人。
每次選舉，總係有奇人參選，好似攞到16個提名、自稱係民建聯成員嘅林國雄，噚日特別搞咗個告別小圈子記者會，話有佢呢亭平民參選，人大選舉都唔再小圈子喎，估唔到民建聯都有咁多奇人異士喎。