八方係球迷，前晚捱完眼瞓捧曼聯場，噚日又晨咁早起身走去跑馬地，捧班行家場，睇由香港記者協會主辦嘅第23屆記協盃。噚日係賽事嘅煞科日，戲碼強勁，八方最關心自然係由本報同事組成嘅「蘋果日報隊」同「有線新聞隊」對壘嘅季軍戰。平時傳媒跑新聞已經鬥餐飽，落到球場更加冇面畀，本報噚日就以9比3擊敗有線新聞隊，一場波有成12個入球，不枉八方瞓少幾粒鐘去捧場，而本報美術組同事馮國康更加喺整項賽事中以11球勇奪最佳射手獎，真係喜上加喜，八方希望同事來年更上一層樓。至於今屆賽事冠軍，就由擊敗「柴娃娃」嘅「東方日報B隊」奪得。