舊年尾先賣咗紐約幢百年大宅嘅羅杰斯，套現成億幾港銀，一家人移居華人社會。多咗咁多錢，羅杰斯梗唔會擺喺銀行，呢排個市咁飄忽，佢有乜投資心水呢？據《北京青年報》報道，呢位商品大王攞咗13萬幾人仔嚟買金幣，唔止貪黃金保值咁簡單，直頭睇好金價未來走勢。
報道話，家陣喺上海嘅羅杰斯，上個禮拜五以每盎斯6600人仔嘅價，買咗幾個2007年熊貓純金幣，呢個只係開始，跟住買到唔夠錢，要走去附近嘅工商銀行提咗10萬現金，再去掃貨。
結果佢捧咗20個金幣加4個銀幣走，盛惠13.48萬人仔。報道話交易時過咗營業時間，電都停埋用唔到數紙幣機，羅杰斯同店舖老闆齊齊人手數銀紙。呢位商品大王仲話，希望金價低番啲，等佢可以入多啲貨，因為長遠睇好黃金喎。
羅杰斯購物清單
‧熊貓幣清單：350元/盎斯03年銀幣4個 合共（元）：1400
‧熊貓幣清單：6600元/盎斯07年金幣13個 合共（元）：85800
‧熊貓幣清單：6800元/盎斯07年金幣1個 合共（元）：6800
‧熊貓幣清單：6800元/盎斯03年金幣3個 合共（元）：20400
‧熊貓幣清單：6800元/盎斯02年金幣1個 合共（元）：6800
‧熊貓幣清單：6800元/盎斯93年金幣1個 合共（元）：6800
‧熊貓幣清單：6800元/盎斯90年金幣1個 合共（元）：6800
購物總額：134800