萬眾期待嘅Wii超級大作《大亂鬥》突然閘前脫腳玩改期，搞到好多預晒時間操機嘅機迷不知所措，尤其呢個禮拜冇乜佳作見街，想搵嘢嚟攝位頂住先都甚有難度。好彩日本方面有別號「超執刀3」嘅《CaduceusNewBlood》，話晒一直都係NDS同Wii用家嘅心頭好，今集仲用可同時雙打作賣點，齊齊對住部電視扮杏林聖手，驟眼睇又唔算好失禮。
文：福田
繼承優良血統第三代
以劇味濃郁取勝嘅「超執刀」系列，早在05年登陸NDS嘅初代已為人共知，𠵱家仲有唔少新用家靠佢嚟過日辰。無他嘅，玩法夠獨特，令人一玩停唔到手。睇準Wii嘅潛力，第二集佢直接由手提機搬到家用機，奈何唔少人都認為玩法尚有進步空間，結果造就今次第三代玩法加入更多新元素。據製作單位講，角色煥然一新但故事卻有延續性，Fans不妨視它為全新章節看待，當佢係完全新作都冇問題。
抵抗醫療恐怖主義
故事搬到人迹罕至嘅阿拉斯加作開端，畫面色調亦變得暮氣沉沉，極能突出男主角自我懊悔嘅無奈滄桑感。同樣以尊敬生命為主題，但着眼點則放在專門研究奇難雜症嘅醫療團體身上，原來大家都懼怕有不法之徒企圖借呢類病症甚至生化武器嚟殘害世人。而且好特別嘅係，故事初期居然會有個直播醫生電視節目，玩家喺萬千觀眾面前表演做手術，雖然唔係啲咩大問題都算能從容解決，但原來佢係步向問題核心嘅第一步。
二人合作齊做手術
唔使多費唇舌，《超執刀3》同上集分別最明顯之處就係可以二人同時進行，而1P與2P可以任揀角色嚟用，性能並無分別，始終Wii係針對全家大細一齊玩嘅平台。要體會醫生做外科手術嘅艱辛滋味，就要將Wii個遙控插住「雞髀」嚟玩先得，否則無法做到一般切開患處組織或做心臟按摩等動作，想成班Friends盡情享受樂趣就記得班定多Set控制器咯喎！
全身創傷救法類同
喺做手術過程中，主要係透過8大指令嚟控制病情，但有時都會因應劇情所需而出現突發性指令，不過無論點都好唔想病人咁易瓜柴，就一定要趁佢仲未死得嗱嗱聲用啱啲指令，只要喺限定時間內完成任務、又冇做錯嘢使其心跳急挫便可。初步判斷過表面傷勢與內臟情況後，就要決定應該使用邊個指令，例如消毒用嘅治療啫喱、殺死微細至極物質嘅激光等，同頭兩集分別唔太大。
機種：Wii
廠商：Atlus
類型：ACT
人數：1人
價格：$388
查詢：I-Gamer（27253338）
