「小器係情趣」。蒙嘉慧自認小器、扭計又任性，偏偏鄭伊健（伊麵）愛。
愛，讓蒙嘉慧改變太多。從前她愛跟男友玩人體photohunt，老是找出他做錯事的10個錯處，又像食環署人員拉小販，一見他錯冇情講；但對着伊麵，倔強的她學會愛、學會體諒，因為男友疼她，還可以讓她任性，簡約的拍拖生活令她甜如蜜，「我好想延續咁嘅生活，好開心、好enjoy！」
近月蒙嘉慧中冷箭，被質疑工作操守，但她依然故我，對無綫高層不擦鞋、不送禮物、不送果籃，堅信巴結冇用，玩另類任性，型！
送走好勝GiGi梁詠琪，來了個任性YoYo蒙嘉慧，伊麵的女人確有個性。 撰文：朱倬誼
《是非篇》
過去大半年，蒙嘉慧是非成籮，當中的三宗罪更挑戰她的演員操守。先是傳她拍劉家豪監製的《溏心風暴》時，不滿被安排演繹第三者角色水擘擘，罷做宣傳抗議；其次是她接演劉家豪太太梅小青監製的《爸爸閉翳》涉虐打童星Jacky仔；最新一宗是她再拍梅小青新劇《法證先鋒Ⅱ》期間，被指工作態度散漫、詐病曠工。
負面新聞當宣傳
不過，又有傳蒙嘉慧因水擘擘角色貨不對辦才與劉家豪意見分歧，此後她突然當黑，拍攝劉太梅小青兩齣劇集俱負面新聞不絕，似被人放料篤背脊，但蒙嘉慧懶理，淡然說：「信與唔信係觀眾嘅事，過程中我有冇做錯？有冇做漏嘢或者唔勤力？我冇。呢個係宣傳手法，揭開雜誌都慣㗎啦，你哋可能聽好多，你問我，我都覺得奇怪，有啲細節講得好清楚，但研究嚟冇意思。如果有一日，樂小姐（高層樂易玲）、珍姐（高層曾勵珍）、家豪哥、小青姐搵我傾，我就會諗我係咪有問題？但今時今日都冇，咁我唔好理囉。
「每個人都有艱苦時候，唔好俾傳聞影響，如果我係成日要演員等嘅人，都匿埋唔講啦，你夠膽問我，我夠膽答，我問心無愧！」
難滿足監製要求
蒙嘉慧強調《溏》劇播出時曾做宣傳，後來公司安排她出埠工作，與傳聞不符；而她接劇本時已知水擘擘是賤人，但集數有限，角色結局篇幅確不完整，她說：「套劇開咁多條線都要埋尾，除非加戲啫，唔可以開頭話水擘擘有咁嘅結局，點解之後冇嘅？夾硬寫又寫得唔好，最後收視唔好你咪仲唔抵？度古仔同最後可能有出入，但演員唔應該去計，要計嘅係自己做得好唔好。」
水擘擘撬老友牆腳，和演程亮的林峯有染，角色犯眾憎，蒙嘉慧直言不喜歡此角色：「我梗係唔鍾意做第三者角色，你都覺得討厭啦！但作為演員，我覺得有發揮。拍嘅時候，我同林峯都憎㗎！狗男女、衰人、賤人！一路鬧一路做，但有幾場戲又幾感動，都投入到去演，係一個挑戰。」
蒙嘉慧和劉家豪因首次合作，故並不相熟，她讚對方是個勤力的監製：「我對每一個監製嘅感覺都差唔多，我好渣，唔識得同監製好熟，你第一次同人合作，你係邊個啫？點解要人哋同你熟？掉番轉頭你又做過乜啫？又冇話成日上去（製作部）見面。」至於梅小青，蒙嘉慧說：「佢係好勤力、要求好高嘅監製，我會盡量配合，佢要求高冇錯，但我都有做唔到嘅時候，佢嘅要求真係好高，做唔到就希望下次更加好。」
拒送禮唔識做人
由於倔強，蒙嘉慧從不打關係，揚言入TVB後未試過送果籃及禮物給高層：「我連樂小姐電話都冇，可能你哋覺得我同樂小姐好熟，但都係公司見面點頭，我見有藝員中秋節送生果，呢樣我永遠唔會識，呢啲咪相對囉，你同人哋冇咁熟，因為冇付出過呢啲關係，但要感恩，雖然唔熟佢哋，但大部份都好清楚蒙嘉慧係咁嘅性格。
「我唔識做人，冇送禮物，唔代表冇送我嘅愛同關心畀人，我用真誠對人，唔係用份禮物去講，我唔識得去講乜嘢叫識唔識做人，我唔識得去做呢啲嘢，可能睇得出佢哋唔鍾意。每個人有自己嘅性格，呢個社會最後都係講實力，當然運氣都好緊要，可能我人生最後目標唔係做呢行，只不過我𠵱家仲鍾意演戲。」但無論有沒有冷箭，蒙嘉慧深信愛能融化一切，以德報怨，豈不更好？
《蒙麵篇》
鄭伊健疼蒙嘉慧倒是疼到出面，他出席商業活動，順勢為女友揀鞋揀電話，最近還買了25萬的四驅新車給她代步，事事預她份兒，問蒙嘉慧：「伊健好錫你呀？」她使勁點點頭，笑得雙眼瞇成一線，甜蜜盡在不言中。
蒙嘉慧說：「呢樣真係要感恩，我唔係一個好perfect（完美）嘅人，我覺得每個人相處都真係要包容，有時自己都未識，反而掉番轉頭，就係當有個人嘅人生經歷比你多，佢就會識得體諒，你要慢慢學習，但要記住機會唔係太多，所以唔好容許自己不斷任性，我同自己講唔好太任性，我都仲任性㗎！」女人任性等同扭計，她認同，還笑道：「扭計係任何人都會有，但大家要遷就，我都不斷學習。」
小器多嘢諗
蒙麵戀眨眼發展將近年半，蒙嘉慧形容現階段感情狀況很好，愛情生活是「簡約生活」，沒有逛名店或歐洲豪華遊，有的只是行山、打羽毛球，也許是人大了，從前出了名是大細路的伊健都修心養性，蒙嘉慧更是無慾無求。「我覺得𠵱家咁嘅生活好穩定、好開心，我好enjoy，諗番轉頭冇乜嘢愁，我好想延續咁嘅生活，好希望可以keep住咁嘅生活方式。」
對於和伊健之間的信任度，她挺有信心說：「都算幾好，其實我算係一個小器女人，算係一個諗得幾多嘢嘅女人，可能我本身性格冇乜安全感，有時諗嘢會多咗，我小器啲嘢好無聊㗎，但一定有啲咁嘅嘢，情趣嚟嘅。」
自認好女友
蒙嘉慧講伊健很sweet，有點扭擰，就像她所說的扭計，例如問她是否認為伊健是個好男友？她說：「好人啦。」然後問她是否認為自己是個好女友？她想也不想便笑說：「我梗係咁樣諗自己啦，點會覺得自己唔好啫？」再問「麵嫂」自覺優點何在？她還是忍不住笑：「首先係謙虛囉！」
「我唔識講呀，以前嘅我缺點唔少㗎，但慢慢長大後，發覺好多嘢可以唔使咁執着，放鬆啲會好啲。以前嘅最大問題係，譬如你話唔食牛肉，點解又食，講過唔算數嘅？又好似約我3點鐘，等到3點半都未到，我就一輪嘴係咁問點解遲到？自己懶有原則咁，唔明煩到人，要學識體諒人，可能佢瞓過龍，佢唔想。總之做錯嘢，我會即刻話畀你聽你做錯，好似嗰啲捉小販，一見到就要即刻捉，當場捕獲。」
唔會迫信教
蒙嘉慧續說：「以前我好鍾意咁㗎，叫你揸車唔好泊街，𠵱家俾人抄咗牌，好㷫㗎，但事實上都係抄咗，鬧完𤷪完，佢無端端俾你哦咗一輪，都係要交告票！咁鬧乜啫？下次試吓學識蹺埋手，當見唔到張告票，如果唔係要諗清楚，呢個人嘅溝通方式你忍唔忍受到？忍受到你就要接受，忍受唔到，你唔好希望可以改變對方。」愛情的魔力有多大，蒙嘉慧有辦你睇，正如她說的不求另一半改變，故她信奉基督教兩年多，從沒想過踢伊健入會，她說：「隨緣啦，況且基督徒都係想宣揚愛的訊息，但佢本身已經好足夠。」
伊健40歲，已屆適婚年齡，但32歲的蒙嘉慧表示暫時還未考慮結婚：「我冇特別諗，每個人嘅人生有唔同階段，個時間你唔會知，今日突然間要發生，我會好好接受，但唔會去諗、去計幾時有結果，暫時人生階段都唔係做呢樣，係諗點樣去幫多啲人，回饋社會。」
攝影：林德雄
服裝：BCBG 化妝：DephineChan
髮型：JohnChung@HeadQuarters
場地：THAILEMONGRASS