許志安月初炒了跟了他15年、拍拖2年的助手「細佬」，傳聞是因為和鄭秀文（Sammi）復合，但實情是他有了一個年紀比他細10多年的新女友，兩人撻着幾個月，現時打得火熱。日前安仔被發現和新女友在九龍城買DVD，還借車給女友揸，安仔昨日接受本報訪問時說：「做得我朋友嘅梗係好女仔。」
許志安助手潘恒章（細佬）在安仔身邊服侍他15年，兩年前傳出二人拍拖，去年安仔父親許明坤過身，「細佬」以契女身份戴孝，代表安仔發言時，更稱許父為「爸爸」，關係非比尋常，不過近日有報道指安仔以莫須有罪名炒了細佬，原因是他和鄭秀文復合，嫌細佬阻碇，所以要她離開。
暫不打算請助手
安仔一直不肯承認與細佬的拖友關係，他事後否認炒了她，更稱她只是身體不適才離職，他日前接受訪問時指細佬有胃病，暫時不想工作，他暫時也不打算再請助手。據本報收到消息，安仔和Sammi復合純粹流料，而細佬被炒，確實和安仔的新戀情有關，但女主角並非Sammi，而是一位年紀比安仔細10多年的年輕女子。
現年40歲的安仔，據知和這位新女友只相識了幾個月，安仔和她迅速打得火熱，細佬身為安仔的助手兼女友，當然第一時間察覺有第三者加入，因而打翻醋埕，安仔惟有做出抉擇，叮走細佬。
日前安仔被發現和新女友一起在九龍城買DVD，並讓女友駕駛他的座駕，安仔昨日接受本報電話訪問時表示，當日相約了一班圈外朋友一起吃飯，未會合朋友前，先和一名圈外女友人一起買DVD，他說：「呢個女仔同我識咗幾年，我同佢去九龍城買DVD，仲借咗架車畀佢揸，諗住買完嘢join埋朋友一齊食飯嘅。」
「將來嘅事邊個知」
問安仔和該位女性友人可有發展機會？他說：「呢一刻大家係朋友，將來嘅事邊個會知。」至於可會追求她？安仔說：「呢個時候專心事業，我冇諗呢啲嘢。」
問安仔覺得女方可是好女仔？他說：「做得我朋友嘅梗係好女仔、好男仔啦，希望大家唔好嚇親我嘅朋友，佢唔係圈中人，唔希望有咁多誤會。」據知當日安仔的行蹤被發現後，因不想朋友被牽連，所以臨時取消和朋友的飯局。
撰文：林妃