超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
你我他年少時應該試過喺水池玩波波，但你可能估唔到身價連城嘅車路士，都喜歡喺泳池波來波往……唔好諗邪嘢，佢哋只係玩水球啫，原來呢個指定動作係自從以色列領隊格蘭抵達後開始，唔通真係練到傳說中嘅「鐵掌水上飄」？
攻勢不及阿仙奴嘅行雲流水，但車仔自格蘭來臨後，球員的確好似輕飄飄，場上嘅攻力亦較前來勢洶洶。日前英國《太陽報》披露，以色列主帥格蘭好似洞悉英國國情一樣，將威廉王子喜愛嘅運動──水球，加入咗球會嘅訓練日程內，務求鍛煉出江湖傳聞中嘅「鐵掌水上飄」。
打水球好鬼認真
格蘭指令中，車仔每場賽後都會去泳池大玩水球對戰，藉此放鬆肌肉，緩和情緒；試想想，一眾威風凜凜嘅千萬球星林柏特、泰利、杜奧巴等，配搭起有點兒「騎呢」嘅水球裝備，在泳池上「波」光劍影、你拋我接，你都咪話場面唔搞笑！
消息人士稱：「佢哋唔係玩玩吓，就跟平日球場練習沒有兩樣，當然，成班球星裸露半身，固然係金「波」閃閃！蔚為奇觀。」不過，格蘭應該唔太識管理心理學，如果佢目的係為咗減壓而玩水球，我求大俠心諗班球星，寧願去油王隻遊艇到鬆一鬆「highP」，好過戴住泳帽掟波啦！
除水球訓練法外，車仔球員亦有自己一套賽前減壓法寶。我求大俠之前提過，大部份球員包括保羅費拉拿、泰利等，均對新冒起嘅創作歌手LeonaLewis情有獨鍾，佢哋賽前會匿埋喺更衣室聽其繞樑歌聲；該女歌手嘅成名作《AMomentlikeThis》，曾寫下30分鐘內被下載5,000次嘅世界紀錄，足證甚受歡迎，睇嚟車仔球員真係跟貼潮流兼且品味十足噃！
話你知：騎呢練波計仔多
若說足球是創意工業也沒半點誇張。除水球外，國內外球壇歷來都有不少另類訓練，例如德甲的多蒙特，曾為了懲罰球員而拉隊到森林跑圈；哥斯達黎加在06世盃前夕，就大打「水上籃球」，增強彈跳能力。
此外，西班牙舊金童魯爾就在家中建起「氧氣廂」，模擬高原的帶氧成份，藉此長保青春；德國隊門將教練高普基的「奇招」是，在球場上搭起被單擋住門將視線，接着從後把皮球擲出，甚至突然在樓梯上把足球滾落，突如其來地考驗門將的反應。
中國女足新帥伊莉莎伯亦有其一套，好像在廣州四國賽備戰期間，就加入了壘球中的跑壘訓練，減輕平日操練時的沉悶氣氛，而且深得球員歡迎。有效與否，周日對美國時或能看出一二。文：阿呢斯奧