元朗又新街是為食鬼的新蒲點，除了恆香老婆餅同B仔凉粉響噹噹外，一街之內竟有多間滷水舖打對頭、燒味店黐到實，平日放工時段例必大排長龍買外賣，下次入元朗一日遊，記得斬半隻脆皮雞，整半邊滷水鵝做手信啦！
記者：盧家蕙、郭佩韻
攝影：譚盈傑
Model：Kimmy、Catherine
滷味
由朝排到晚
身為元朗靚師奶肯定幫襯過「新順興」，下午四點，店外開始迫滿人，旺到晚上九點。店主吳先生：「鵝日賣40隻，鴨也有60隻，最多人買鴨下巴、掌翼等，手快有手慢冇！」訪問當日正值下午三點，鴨下巴早賣光，冇得影。新順興店內有五鍋人咁高的滷水汁，分別做鵝、鴨、翼、雜和豬大腸。「豬大腸有臭味，要另加料辟味，唔通又用佢滷鵝。雖然我唔係潮州人，但我會不斷改良，調校最啱食客口味的滷水汁！」
滷水鴨$75/隻
惹味香口的鴨肉，肉質腍軟，甘甜不會死鹹。
滷水鵝$64/斤
最受歡迎的滷水鵝，滷水味適中，鵝肉嫩滑，每日賣出40至50隻，假日至少70隻。
鵝翼$6-$18/鵝腎$6-$9
鵝翼分特大、大、中及細，鹹香又入味，最啱佐酒。鵝腎頗入味爽口。
新順興潮汕滷味專門店（24769348）
地址：元朗又新街7至25號元新大廈9號地舖
陳年滷水膽夠味
「潮冠滷味大王」雖名大王，人流卻不及對面「新順興」。籍貫潮州的鄭師傅：「佢早過我哋開，打響咗名堂，外賣客見邊度長龍咪去邊度囉！」店內滷水美食呈深啡，比別店的深色，師傅火火地：「正宗滷水係咁深色，滷得耐先上色入味！」小店的陳年滷水膽汁有十幾年歷史，以十多種藥材製成，汁靚鵝亦靚。「人哋用雪藏鵝，我用冰鮮平頭鵝，貪佢肉嫩唔肥易入味。」眼見對面生意滔滔，鄭師傅無奈：「佢啱港人口味，我多潮州客捧場！」
招牌滷水鵝$60/斤
每隻重八、九斤，吃起來啖啖肉，皮香卻不帶肥膩，味道陳香沉厚。
正宗潮州蠔餅$25
即叫即煎，以潮州薯粉、珍珠蠔和鴨蛋拌勻來煎，比坊間用雞蛋更香口，蠔仔鮮香又肥美。
潮式羊肉$60/盒
潮州人傳統羊肉美食，羶香且肉嫩，冬天才有得吃，很少店懂得做，暖胃佳品。
豬大腸（$56/斤）清洗得很亁淨，非常甘香！鵝腎（$6-10/隻）及墨魚（$6/両）很爽口入味。
潮冠滷味大王（24430838）
地址：元朗又新街宏豐大廈地下12號舖
燒味
碟頭飯日賣400碟
「齒留香」自設工場，每有新鮮燒鴨出爐，香氣四溢。老闆張金合親手燒鴨燒叉燒，還另闢專賣燒味飯麵的餐廳，單雙拼一律$20送例湯，飲品另加$5，極抵。張師傅：「午晚市必爆場，日賣近400碟燒味飯，最受歡迎是燒鴨及叉燒，燒鴨日賣約40隻，售完即止，開業僅7個月老早回本，果然有料到！」
招牌燒鴨$75/隻
用八角、香葉等醃製燒鴨，比一般燒鴨皮脆，肉新鮮，點醬汁反破壞肉質鮮味。
特色叉燒$45/斤
將叉燒燒至8成熟配上由海鮮醬、麻醬等製成的醬汁，吃來肉軟鹹甜味適中。
燒味飯套餐$25
幾乎蝕本的燒味飯餐，半肥瘦叉燒最正，入口夠腍，肥膏夠滑。套餐連飲品。
齒留香（60370047）
地址：元朗又新街27B建威大廈1號地下
雞
毋須蘸汁的滋味雞
路邊突傳來陣陣雞香，引領我到「大良金牌滋味雞」，老闆范偉強三代均是好雞之人，為食靚雞，強哥竟走到大良學整滋味雞。滋味雞每天只炮製200隻，卻必賣光。范師傅醒你煮雞Tips：「想冰鮮雞更鮮美，煮前必用加入薑的上湯浸，鮮味先突出。」
大良金牌滋味雞$50/隻
肉滑連雞胸肉也不嚡口，帶香料味，不用蘸醬汁，也吃到雞的鮮味。
順德薑葱雞$50/隻
每日限100隻，煮前要先幫雞做熱身，用上湯烹調，伴薑葱汁更美味！
秘製鹽水鴨$40/隻
精選不足2斤重鴨，用秘製鹽水浸熟，相比滷水鴨，味道不太濃。
大良滋味雞（24782377）
地址：元朗又新街27B建威大廈3號地下
