Adler珠寶前日在金鐘舉行「覓世之光」珠寶設計比賽，五位年輕設計師與多位名人包括羅寶文、羅霖及阮偉文等合作設計。羅寶文自言各方面都靠「食腦」，她說：「人生一係勞動，一係食腦，我讀書成績科科A，惟獨體育最叻都係C，試過攞14A1D，就係D喺體育，冇法啦，我四肢唔聽我話，惟有食腦。」談到她與羅可旋弟弟Bosco將度過首個情人節，她說：「感情事想低調啲。」兩人拍拖數月，有傳近期已分手，她說：「唔想講，感情事又涉及其他人，唔好迫我。」
羅霖唔靠老公
羅霖則對設計大呼有新鮮感，她說：「我唔鍾意珠寶首飾只係吊住一粒鑽石嗰種，我會買設計細緻、有主題嘅珠寶，好似動物、花之類。」問她可會叫老公買鑽飾，她笑指只會暗示，她說：「何太（Adler老闆娘）好過我老公，佢係我背後支持者，無限量支持我，幾億元珠寶都贊助我戴，好過老公啦。」
採訪、攝影：LawWaiMan
