馬主N來電通知，今朝係傷健策騎協會（RidingForTheDisabled）之賣旗籌款日，早上在香港島舉行，請各界人士大力支持，在街頭上碰到為RDA賣旗之學生或義工，不妨慷慨解囊。
街上買旗（其實係買一個貼紙），畀一蚊兩蚊，五蚊還是十元硬幣呢？左丁山好多時都係畀五蚊或十蚊。香港每一個慈善機構舉辦賣旗籌款，須要得到社會福利署批准，賣旗後要向社署提交核數師報告，規管得十分嚴格。另外社署又規定賣旗所得款項之中，用於行政費用嘅支出（譬如交通、早餐），不能超過一成。據一位搞手講，為避免超支，好多行政費用都盡量由另外一批有心人認頭，唔入數，當作無名捐款。所以為慈善團體做義工，真係要出力又出錢也。各位肯畀十蚊買旗，聽學生哥講一聲多謝之餘，當知背後已有大批人付出心血。
傷健策騎協會主席（Chairman）係陳祖澤，會長（President）係楊國琦，兩人在馬圈內無人不識。RDA與賽馬完全無關，純係騎術體育會，且專係為傷健人士而設，適逢今年係奧運馬術年，馬會為馬術賽提供世界一流比賽場地，RDA則派葉少康為代表參加傷殘奧運馬術賽，故此馬會與RDA都為奧運馬術而忙個不休，馬會就有財有力有人啫，RDA就缺人缺力缺財，陳祖澤兩邊都睇到實，咪話唔辛苦。
好好彩陳祖澤素來醒目過人，係WorkSmart之輩，應付繁忙工作，綽綽有餘，唯一遺憾，相信就係佢隻馬「真功夫」好耐未贏過頭馬啫。其他啲事，佢講幾句就應付裕如啦，例如運輸及房屋局局長鄭汝樺見記者，明屈馬會出十三億嚟興建地鐵港島南區線嘅馬場站，當馬會係政府小金庫，陳祖澤就一於企硬唔制，運輸局即刻冇聲出。左丁山與唔少馬迷及馬會會員傾過，一致認為跑馬地馬場站有益大眾，方便居民，並非專門畀馬迷使用嘅，有乜理由要馬會畀錢？大概住響跑馬地區嘅，全部係有錢佬，政府與港鐵以為可以毋須理會。