早前因病逝世嘅攝影師鄭智聰（JC），前晚佢嘅家人喺世界殯儀館幫佢設靈，噚日朝早出殯。喪禮以基督教儀式進行，遺體之後送去柴灣華人永遠墳場安葬。圈中好友如鄭融、薛凱琪，At17、Rosanne等都有去殯儀館見亡友最後一面。
鄭融珍藏紀念冊
前晚薛凱琪到達殯儀館，聽記者發問時，只不斷擰頭拒回應，但離奇地儍笑，離開靈堂時又顯得神情凝重。
每位親友離開時手持黑色紀念冊，鄭融話：「呢本係JC家人畀我嘅，我會好好保存。」李蘢怡離開囗陣為咗避開記者衝出馬路，甚為危險。另外，作為老友嘅張敬軒，有情有義連續兩日為亡友打點一切。噚日早上約10點，佢一臉倦容抵達殯儀館。
眾親友瞻仰遺容，軒仔戴上白手套，聯同其他親友扶靈，儀式約12點完結。離開殯儀館時，大部份親友神情哀傷同哭泣，軒仔雙眼通紅，要用手抹去眼淚。軒仔接受訪問時話：「我今日帶咗本聖經嚟，送畀JC陪葬，希望佢安心。」
