亞視繼用節目《十六不搭喜趣來》狂踩無綫之後，近日又搞咗個「豬年電視風雲選舉」嚟挑釁無綫總經理陳志雲。今次亞視用王賢誌主持嘅《電視風雲50年》做牌頭搞選舉，獎項包括「最出位電視人」、「最成功踩過界電視人」、「最過度曝光電視人」、「豬年電視新人王」同「最多是非藝人」等，每項候選名單都有陳志雲份，而徐小明都有「最出位」同「最過度曝光」兩項提名。
王賢誌自認唔夠爭
雖然話就話公開畀觀眾網上投票，但馮仁昭聽聞亞視會「造就」陳志雲橫掃所有獎項，擺明搞個選舉嚟挑釁陳志雲。
對於亞視今次搞呢個選舉，王賢誌噚日話事前毫不知情：「自己只係主持，我都係喺名單出咗之後先接到通知。」問覺唔覺得呢個選舉明玩陳志雲，王賢誌話：「豬年就嚟完，我覺得都幾得意，個選舉未必係為陳志雲度身訂做，但佢咁紅，係好有資格競逐呢幾個大獎！」其實王賢誌都有份角逐最多是非同最出位電視人，但佢話自己一定唔夠陳志雲爭喎！
