面對港股大調整，散戶都好無奈，大家喺《香港討論區》憑歌寄意，有啲仲改埋歌詞，最到肉嘅一定係古巨基首《愛得太遲》：「最心痛是，『放』得太遲。」仲揸住貨嘅散戶，相信都會好似warlan咁，「越『望』越傷心。」分分鐘仲會同ykho3388一樣，晚晚「啊……無心睡眠，啊…腦交戰。」
Carsons一於沉醉過去，「韶華去，四季暗中追隨，逝去了的都已逝去。啊……常見明月掛天邊，每當變幻時，便知時光去。懷緬過去常陶醉，想到舊事，歡笑面常流淚。」Peterli2748比較睇得開，覺得「小小苦楚等於激勵。」仲話：「前望我不愛獨懷舊，名和利我可以輕放手，是我的雖失去他日總會有…」
Bergie則後悔高追，改編咗吳雨霏首《逼得太緊》，「如我知錯，可否乃念最初，最高位買入過，要跌下懲罰我，怎可……Oh你太重要使我蝕亦蝕得多，跌要跌得多，資金怎可被蹉跎…」牛仔骨將傅珮嘉首《絕》重新填詞，大嘆被輪商拖累，「還不夠絕望，尚可更絕望，就給窩輪蝕爆來形容前面慘況，能這低價，謝輪商幫忙，將錢用嚟做個風光大葬。」