去澳門，真係人人都會變骨精，澳門搞「骨」，已經進入化境，當大家在香港嘆「正宗澳門豬骨煲」時，澳門的豬骨煲正不斷在變，絕不拘泥於正不正宗，只有好不好吃，不少食肆，已獨創自己的一套「骨」功冧客，導人成骨精。
記者：張一豪
攝影：楊錦文
紅胡椒夠矜貴
澳門有家火鍋店，有個用雀仔屎做的豬骨煲，老闆王先生說：「我哋用嘅係紅胡椒，世上無紅胡椒呢種植物，但紅胡椒又確實存在，呢種胡椒好珍貴，源產於柬埔寨嘅樹林，嗰度有種專食果實嘅雀仔，特別鍾意將成熟嘅胡椒作為糧食，但因為胡椒有殼，雀仔消化唔到就排泄返出嚟，喺消化過程中胡椒殼喺雀肚入面發酵，再被陽光暴曬後，就變成罕見嘅紅胡椒。」
「柬埔寨人當佢哋係寶，執咗洗亁淨再曬亁，味道辣得嚟有種香醇馥郁，更保留了胡椒本身祛濕及驅風之效，當地人更認為可以健脾、明目同養顏，係胡椒中嘅極品。金邊人只會將紅胡椒做新年賀禮，而我姐夫喺金邊開胡椒園，所以先有呢啲紅胡椒。紅胡椒嘅味道唔會死辣，仲有特別嘅香味，所以好多人試過我哋嘅紅胡椒湯底後都食過翻尋味，呢個湯底最好配肥牛、羊或海鮮，不但唔會搶咗食物嘅鮮味，仲會將味道提升至極點。」
鮮茄薯仔馬介休湯底MOP58
活用葡國的馬介休做材料，先將馬介休浸水去鹽，煎香後熬湯，配番茄、薯仔、橄欖油等，很有澳門風味，淨飲湯都十分美味。
法式洋葱湯MOP30
湯底用做火鍋牛肉的「頭尾」剩料去熬，牛味十足，再以法式洋葱湯做法，加入大量洋葱，令湯底更甜，配菇菌、牛肉最出眾。
安格斯肥牛拼坑腩粒MOP78
美國安格斯牛肥美有肉味，配油香兼有𡁻頭的本地牛坑腩粒，一次過嚐盡兩種不同牛的質感。
橫琴蠔MOP18/6隻
冬天珠海橫琴蠔當造，又肥又甜，用來打邊爐一流，澳門鄰近珠海，省卻不少運費，抵吃得無話可說。
蜆魚（前）MOP28/5條、五爪螺（後）MOP2/両
蜆魚煎香打邊爐，有點像沙甸魚，但更甜更滑。五爪螺即香港人稱的角螺，入口十分爽甜。
魷魚翼MOP28
澳門手信店賣的亁魷魚絲，原來只要肉身不要尖頂的兩塊翼，將曬亁後的魷魚翼浸軟，用來打邊爐，爽脆又有吊片香。
食客有感
來澳六年的馬場主任Nige：
「我同一班練馬師經常嚟，一星期起碼一次，呢度嘅骨煲特別正！」
旺角海鮮火鍋
電話：（853）28832480
地址：澳門氹仔佛山街金利達花園第二座
營業時間：6:00pm-3:00am
骨煲改良進化
如果講澳門骨煲專家，非「新南粵成記美食」老闆Eddie莫屬。「澳門骨煲喺十幾年前源於工人球場（即新葡京現址），以前有好多大牌檔，其中一檔以燜骨聞名，於是有人將燜骨變為湯狀骨煲，即現時的骨煲。」他們的骨煲，煮前將骨去皮減膩，煮完後更會去表面的油，令湯底好清，並演變出多種改良的骨煲。
烏雞白鳳丸
MOP40
烏雞肉加入當歸打成丸，十分滋補，出奇好多男士都喜歡吃，而白丸是他們馳名的鮮打墨丸，很爽。
乳豬骨煲MOP128
用傳統清湯骨煲，鋪上自製的乳豬，乳豬皮脆肉滑，跟只是有骨落地的骨煲比較，多了一些咬口。
葡式骨煲MOP118
葡汁很漏不能當湯飲，澳門有種緬甸椰汁雞麵，湯汁香濃，入口甚清甜，做骨煲椰香濃郁，另有一番滋味。
咕嚕蓮藕（前）MOP38、椒鹽金菇（後）MOP35
椒鹽金菇甘香鬆化，咕嚕蓮藕為吃齋人而設，味道跟咕嚕肉無異，只改用蓮藕。
新南粵成記美食
電話：（853）28437686
地址：澳門何賢紳士馬路南粵批發市場一樓A（近鴨涌河）
營業時間：6:00am-2:00pm、5:30pm-2:30am
插飲管慢慢啜
澳門骨煲多用豬腳仔骨和雞腳骨，而「老地方」的骨煲，則用筒骨加秘製胡椒湯料熬製，味道香濃，用飲管啜骨髓，過癮。由於筒骨供應有限，有時開舖兩三個鐘就賣晒，所以要吃請早。
筒骨煲MOP98
幾乎每枱都有一煲，湯味濃鮮，骨髓甘香，可以插住飲管慢慢啜！
花雕雞煲MOP110
用全隻鮮雞及特製醬料製成，以為很辣，入口卻只是微辣，酒香極濃，灼火鍋生料毋須蘸豉油。
游水生切八爪魚MOP48/例
游水沙嘴八爪魚，即叫即切，放入湯中灼時八爪魚仍在掙扎，新鮮到極，不韌。
食客有感
王生：
「我住氹仔咁遠都過嚟，一個月起碼一兩次走唔甩。」
雄裕老地方美食
電話：（853）28435064
地址：澳門關閘馬路泰豐新村大豐銀行石級平台上
營業時間：6:00pm-3:00am
註：MOP即澳門幣