何文田劉小姐摸頂買咗中國重汽（3808），佢打上嚟呻：「諗住隻重汽話晒係內地重型汽車股龍頭，應該唔會差得去邊，喺12.8蚊買入，點知原來高追咗，股價係咁跌，家陣都唔知點好。」
事實上，重汽11月尾上市以嚟，一直都未浮過上水，最高都只係去過12.82蚊。重汽前日創出收市新低後，噚日即市再創8.61蚊新低，最後隨大市造好，微升1%，收9.16蚊，但比起招股價12.88蚊，已大跌近三成；劉小姐賬面計落亦蝕緊28%。
訴訟纏身 多競爭對手
孫柏文問：「今日重汽曾經跌穿9蚊，落到8.61蚊嘅歷史低位，你又冇set止蝕價，乜你唔驚嘅咩？」劉小姐回應：「冇得驚，噚日港股跌得咁犀利都唔驚，今日仲驚咩，如果玩細價股，自己一定會定止蝕價，諗住隻重汽係龍頭股，咪放心啲，點知搞到咁。」
敦沛金融研究部主管郭家耀表示：「𠵱家重汽同濰柴動力（2338）有單官司訴訟，而重汽呢間公司喺市場上面對唔少競爭對手，因為進場門檻唔高，雖然佢會受惠基建發展，但家陣股市跌咗咁多，唔少基建股都平咗好多，倒不如直接買基建股。」佢建議沽重汽，轉買中國交通建設（1800）同中鐵（390）；中交建同中鐵股價噚日分別收20.8蚊同9.68蚊，較高位回落18%同19%。
高追中行 無謂再溝貨
除咗重汽，劉小姐亦喺5.2蚊高追咗中行（3988），噚日中行收報3.44蚊。劉小姐問：「家陣溝唔溝得過？」郭家耀反對劉小姐溝貨並提醒：「溝上唔溝落，溝到淡而無味，無謂啦！家陣有啲仲平、仲有前景嘅中資金融股可以選擇，好似建行（939）同招行（3968），無謂揀受次按影響嘅中行。」
《劉小姐個案》
中國重汽（3808）
買入價：$12.8
目標價：－
止蝕價：－
時間：半年
中國銀行（3988）
買入價：$4.3及$5.2
目標價：－
止蝕價：－
時間：半年
滙豐控股（005）
等$109低吸
滙控（005）今個禮拜急挫，股價前日最低見過114.2蚊，係近3年半以嚟嘅新低，大笨象噚日終於升返上嚟，收119蚊，漲3.5%。黃大仙劉小姐見滙豐股價之前急跌，就問：「𠵱家係咪買滙豐嘅時候？」佢建議109蚊買入。
孫柏文話：「家陣滙豐好似擺喺個黑色箱入面，仲喺個冇燈嘅房，你完全唔知嚟緊嘅風險，估計佢仲未跌完，都係要睇埋佢3月公佈嘅業績，先至好諗住入。」
郭家耀亦話：「滙豐面對英美經濟正走下坡，除咗受次按拖累，仲受到消費信貸減少影響，所以要睇定啲。」
《劉小姐建議》
建議買入價：$109
目標價：－
止蝕價：－
時間：3個月
中國網通（906）
繼續炒重組
西貢黃先生睇好一眾中資電訊股，特別推介中國網通（906），佢認為：「西班牙電訊都增持網通，而且大摩出報告話睇好中電信（728）同網通，重組概念有得炒。」
網通噚日收報25.05蚊，升5.9%，黃先生建議現價買入，23蚊止蝕，目標價睇28蚊，短炒三個月。
郭家耀話：「現階段有值博空間，網通抗跌能力好強，可以博重組概念，買入價25蚊，目標價睇28蚊唔係太過份，升幅都係睇12、13%左右。」孫柏文都好認同重組概念，仲話「短期走勢靚到不得了」。
《黃先生建議》
建議買入價：$25.05
目標價：$28
止蝕價：$23
時間：3個月
中國人壽（2628）
唔穿牛熊線 上望$38
《擔心》
美孚陳太打嚟問中國人壽（2628），𠵱家做咗蟹，都唔知點算好，「揸住43蚊入嘅國壽，冇定止蝕價，打算睇多兩個月。」孫柏文就建議陳太首先定番個止蝕價先。
郭家耀話：「我就睇得比較好啲，雖然今年A股好難好似舊年升成倍咁好表現，但係國壽手上揸住嘅A股多數係由IPO攞番嚟，成本比較平，唔需要太擔心佢喺A股市場蝕大錢，噚日同前日兩次都試過32蚊左右低位，可以見到支持力度同反彈都會唔差。」
孫柏文話恒指到200天平均線、即24300點，就係國壽入貨時機，可以喺呢個位博反彈，「到26000點左右就要走。」
陳太問可唔可以溝貨，郭家耀話：「睇番你43蚊入，𠵱家都可以小注，其實唔使太擔心，只要唔再跌穿32蚊呢個位，上番43蚊都唔係冇機會，如果穿咗32蚊，就要考慮先止蝕。」
《陳太個案》
買入價：$43
目標價：－
止蝕價：－
時間：－
《睇好》
旺角Peter同陳太一樣討論中國人壽，不過佢無坐艇，反而係建議大家買貨，睇好原因係「由03年牛市到𠵱家，除咗舊年8．17（8月17日大奇迹日）穿過250天線（俗稱牛熊分界線，現處32.4蚊）之外，其他日子都企得好穩。」Peter建議34.7蚊買入，目標價38蚊，止蝕價32.8蚊，屬短炒性質。
郭家耀表示：「一般投資者見跌咁多就會博反彈，仲有一種信念係V形反彈，市場一估就估到好好，今年宏調態度有變，就算??家反彈都唔會去返之前咁好，不過目標價定38蚊都可以。」孫柏文都話38蚊定得幾好，又問Peter身邊多唔多朋友清倉，Peter就話：「大摩啱啱出咗份報告都話好，身邊有人長揸國壽，不過清倉比較多。」
郭家耀就提醒Peter：「我都睇漏眼冇諗到美國嗰邊咁差，今年恒指睇四萬點嘅可能又低咗。」國壽噚日收報35.5蚊，升6.1%。
《Peter建議》
建議買入價：$34.7
目標價：$38
止蝕價：$32.8
時間：短線
今日嘉賓：亨達集團研究部董事黃敏碩
每日收市後4:30pm
歡迎Phonein28698262
http://finance.appledaily.com
想搵名家教路，請登入 http://appledaily.atnext.com/jp/finance登記成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
