政府推行「三三四」新學制人人讚好，不過巧婦難為無米炊，大學校長打晒「開口牌」，話通脹加劇百物騰貴，現有經費不足以應付興建新宿舍、課室，希望教資會開水喉酌量增加撥款，教資會主席查史美倫出名數口精，噚日同傳媒茶敍時話，政府撥款畀大學時已計埋通脹因素，一句到尾，個餅就係得咁大，唔會加碼。
查太仲下令有關建築工程唔可以有延誤，「希望」各大學新教學大樓喺2012年前落成，有足夠宿舍、課室畀學生用，佢搵咗前高官楊永強做「三三四基建工作小組」召集人，負責監督工程進度。小強當年因為沙士死得人多落台，大學建築工程延誤，應該唔使入佢數。