火熱感應

現時唔少Notebook都配備眼仔鏡頭，不過大多數都係只當作陪襯，能深入應用絕無僅有，呢次Lenovo推出的Y510a就將眼仔發揚光大，開機登入時可加入人臉識別功能，亦可以將登入用家個靚樣拍低，建立訪客留影相簿，那位用過都絕無遺漏。再加埋極具創意的熱能感應操作及全新外形，擺脫以往呆板嘅設計，價錢仲唔過1萬，要換新機諗得過㗎！

記者：許福合
攝影：梁細權
Model：Wing

熱能觸控　死物唔掂

新推出嘅Notebook好多都會加入快捷徑功能，用家可以設定預設軟件，快速開啓，提高操作效率，Y510a當然唔會缺少類似功能，而且更係另類輕觸式按鍵，屬於熱能感應操作。當用有熱量的物體貼上按鍵，電腦就會作出反應！現時預設功能分別係播放音樂及均衡模式，操作最簡單方法當然係用手指輕輕接觸。由於係感應熱量，用家只要輕輕一按就會有反應，操作都幾特別新鮮。鍵盤上設有多種熱能感應，筆者用手指試用時問題不大，但用死物接觸時即使按下都無反應，冬天手太冷不知會不會失效呢？

a.於鍵盤上設有多組熱能感應鍵，會有光線顯示。

b.使用手指，只要輕輕接觸就可以啓動按鍵功能。

c.用無溫度嘅筆尖篤熱能感應，完全無反應。

d.用家可以自行設定熱能鍵來啓動軟件。

e.機身設有網絡開關及多合一讀卡器。

■採用15.4吋WXGA屏幕，無論工作或娛樂效果俱佳。

AV級音響　靚聲享受

同好多新型Notebook一樣，新機當然具備有視像鏡頭，並且利用人臉識別技術，可於登入時配合確認。而預載嘅《Vista》模式登入下，更可以利用眼仔進行訪客留影嘅功能，咁無論邊個曾經用過電腦，都可以隨時翻查，仲有根有據！見到咁強嘅保安功能，唔好以為Y510a係一部商務機種，其實多媒體方面功能亦相當唔錯，首先最搶眼當然係用上個15.4吋屏幕，配合內置使用NvidiaGeForce8400顯示卡，畫面質素絕對係水準之上。另外再加埋機身兩側設有4個揚聲器，再加機底低音組，欣賞電影時可製造出極震撼嘅DolbyHomeTheatre音響效果，Notebook之中亦係少見，對注重音響質素嘅用家就會有極高享受！

■當登入時，會將使用者拍攝紀錄。

■有咁多多媒體功能，又怎可少得遙控器呢！

■屏幕頂可見有130萬像素鏡頭，登入時可作記錄用家相貌之用。

■除咗機面4組揚聲器外，機頂更有低音揚聲器。

屏幕特殊設計

新一代Lenovo雖然係繼承自以往紅極一時的IBM品牌，不過從近期機種亦可以見到外觀上已開始擺脫以往IBM嗰種死板嘅設計，首先要提嘅係用上近似布紋質感機面，摸上手極有手感。第一個感觀已經與其他機種唔同，而屏幕用上嘅特殊設計，與機身連接位置採用獨特連接方式，當打開後可以令到屏幕與用家保持一個較一般Notebook更遠距離，據講可以令到用家視覺上更寬闊、視覺效果更佳！另外仲要一提電源顯示設計，當打開機蓋後，可以透過光線反射方式，將電源顯示反射到屏幕底下位置上，方便用家無論開機或關機，都可以隨時查看電源使用情況。講真實用性就真係唔大，不過肯花心思在設計上，用家使用時當然亦會更為受落，係咪？

■用上布紋質感機面，手感唔錯。

■透過光線反射，將電源使用情況於屏幕上顯示。

■按下「一按恢復」鍵，就能將電腦還原至備份狀態。

■當按下恢復鍵，電腦就會進入專用介面進行備份還原，過程簡單。

Profile

處理器：IntelCore2DuoT7500
記憶體：2GBDDR2
光碟機：DVD-RW
屏幕：15.4吋WXGA
網絡：802.11a/g/n、藍芽
顯示卡：NvidiaGeForce8400MGT
硬碟：250GB
重量：2.95kg
操作系統：WindowsVistaHomePremium
體積：340×253×26-37mm
查詢：Lenovo（800938838）