隨着近日無綫劇集《野蠻奶奶大戰戈師奶》劇情高潮迭起，演員間的是非也越炒越熱，「野蠻奶奶」阿姐汪明荃更越鬧越㷫。繼早前不滿無綫大刀闊斧刪剪其戲份，及與許紹雄鬧不和後，阿姐近日又因無綫內部人為錯失，把刪剪的《野》劇片段洗得一亁二淨而大動肝火，昨日她在電話中不滿地說：「真係好離譜！」
汪明荃、胡杏兒和黃宗澤（Bosco）等昨日現身九龍灣，出席《野蠻奶奶大戰戈師奶》簽名會時，表示下周日（27日）會相約劇中一班演員到阿姐家欣賞大結局，猶記得早前阿姐曾透露劇中的蝦碌片段可合成一集播出街，記者問阿姐大結局時是否會播出那些蝦碌片段時，她聞言即扁扁嘴說：「我都以為會播，都有提議過，不過好似話有啲困難播唔到喎，你哋去問監製啦！」
監製無奈
「我哋都苦惱緊」
阿姐早前曾表示不滿無綫把《野》劇中一場她向胡杏兒詳細講解絲襪歷史的劇情大大刪剪，據悉無綫原來刪阿姐戲還不止，更把所有蝦碌片段及拍好的剩餘未曝光片段洗得一亁二淨，令阿姐火上加油，㷫過辣雞。
記者昨日再致電向阿姐了解此事時，她說：「好shock（震驚）囉！部劇都未出晒街，有乜理由將剩低嗰啲片洗晒？任何一部劇都唔會咁做啦，真係好離譜！莫講話成班演員拍得好辛苦，呢啲片係公司資源嚟㗎嘛，而且仲係第一部高清劇㖭，所以嚟緊播出街啲片真係好珍貴，大家記住要睇。」
記者其後致電《野》劇監製張亁文了解時，他承認因人為錯失而把剩餘片段洗去，他說：「我哋都苦惱緊，阿姐的確為咗呢件事好㷫，始終大家拍得咁辛苦，就算要洗啲拍多咗嘅片段，都唔差在等到27號（大結局）之後，我知道呢個消息之後都好震驚，但係咪有人要受處分我答唔到，亦唔方便評論，總之一切交由公司處理。」
此外，近日有報道指杏兒與Bosco在美孚築愛巢，28歲的杏兒更被父親迫婚，其父又大讚Bosco是好仔一名，身為劇中的奶奶，阿姐有否聽聞二人打算結婚？阿姐說：「吓！冇喎，我都冇聽過杏兒話要結婚，佢只係話呢幾年都要以工作為先，Bosco都係好仔嚟嘅。」
心靈相通
杏兒宗澤同稱單身
杏兒與Bosco昨日未見有尷尬，不過二人就分開做訪問，杏兒承認買樓給父親是真，不過自己還未打算置業，她說：「如果再買樓都買畀阿媽先，之後先到自己，我要求好高，所以要再儲下錢先。」談到被父親迫婚，杏兒說：「我老竇都成30幾歲先生我，佢唔係咁守舊，我都未有對象點結婚？我家姐啱啱先結婚，仲生咗個仔畀我老竇玩，我唔使咁快結住。」
雖然分開做訪問，不過Basco和杏兒卻心靈相通，他同樣指自己冇拖拍，有人取笑他行外父政策時，Bosco說：「只不過係朋友嘅爹哋，我哋只見過一次面。」杏兒爸爸新居入伙，問他會否送禮？他說：「我同佢（杏兒）又未friend到呢個地步，我生日佢都未送禮物畀我，如果送咪送盆花囉。」
採訪：戴彩煥、胡比
攝影：陳順禎
癡心小八卦：男歌迷DIY阿姐親密照
汪明荃的歌迷對她的癡心情長度，絕不遜於時下年輕人，昨日阿姐一位忠實男歌迷，除送上一本被他稱為是汪明荃秘史的相集外，還將自己的近照與阿姐的照片放在同一個相架中送給阿姐，阿姐看後忍不住皺一皺眉，不知他想得到簽名還是有別的要求，於是她問：「你想點呢？」最後歌迷將所有禮物送給阿姐後滿心歡喜地離開。
