潮流興講環保，恒生銀行（011）早前響應環保兼做埋善事，一舉兩得。話說恒生早前將中環總行啲枱凳換過晒，雖然話係舊家具，其實都仲好襟用，就咁掉咗去實在太嘥喇，所以恒生搵咗回收商，即係俗語叫嘅收買佬嚟，收鬼晒批舊家具，估唔到咁都賣到20萬銀，批家具有幾多華華唔知，但賣得咁多錢，一係啲家具仲好有價值，一係就好大批貨。
咁多咗20萬銀，點用好呢？恒生索性取之環保，用之環保，捐咗畀「香港地球之友」。恒生環保先鋒薛關燕萍話，咁做係想鼓勵大家循環再用，同支持綠色新年，加上恒生同「香港地球之友」係「地球夥伴」，亦好支持《環保賀歲‧年年有餘》計劃，咪幫番自己人囉。至於個環保新年計劃呢個月就會推出，主題係「減廢、再用、再造」，都係叫大家喺新年節日期間咪咁浪費，好似賀年禮物用簡約包裝，用少啲花紙，用番啲舊利是封呀咁。