一班妹妹仔以嫩口作賣點，柴娃娃地唱歌，在每集節目中學一門技能，然後比賽誰做得最好，這是台灣黑澀會的特色。香港最近也有一隊叫高清補習社，也是由一班青春少艾組成，在節目中學做各種才藝，但網民狂數她們抄襲黑澀會，又批評她們醜八怪。其實，天下文章一大抄，黑澀美媚和高清寶寶的概念，都似足日本Morning娘。
繼日本的Morning娘、台灣大熱的黑澀美眉後，最近香港也有「高清補習社」，找來一班寶寶比拼才藝，三者都是湊合後生可愛小妹妹做組合表演。港產高清寶寶比黑澀會遲出道，所以被指老翻，更有很多網友於高清補習社網站留言，狠狠抨擊，字眼甚為尖酸刻薄。
「節目係有教育性」
由網站設計的《高清補習社》，性質和形式有黑澀會影子，不過以高清做賣點，食正時下話題。其中八位成員日前接受訪問，她們誓言不是抄，別人賣點是可愛，她們則sell內涵，個個不斷進修。李泳芯（Nika）學彈琴要有李雲廸的成就，張敏芝（蚊蚊）有一手好文筆要學填詞，洋葱頭的顏后君（Cecilia）要夾band等等。Cecilia拍拍心口肯定地說：「我哋人夠多，有跳舞叻嘅、有唱得嘅、做戲叻又有，識作曲嘅有，寫嘢叻識作詞嘅都有，我哋好似全盒一樣，乜都齊。」張美琦（Maggie）說：「唔可以話抄，係少少似，但有睇我哋節目嘅人，睇睇吓就知，我哋個節目係有教育性嘅。」
「我唔做一個花瓶」
然而青春少艾被評為醜女，會是拮中要害嗎？蚊蚊用十足新時代女強人口脗說：「靚過我哋嘅人有好多，但我唔做一個花瓶囉！」梁敏兒（Monique）說：「我哋個個有自信，就算唔夠靚，但唔醜樣。」最精靈的陳煦晴（Phyllis）補充說：「係各有特色！我哋有香港文化，迎合到香港人口味。」
採訪：王連連
攝影：陳偉權
髮型：HHhair.nail
