律政司司長黃仁龍初上任之時，甚為低調，少發言，未有政績之時，竟然民望甚高。近期黃司長民望下降，唔知係唔係佢連任律政司司長之後，開始多聲氣所致呢？呢期黃司長管轄嘅部門處理民間電台事件，林建岳超速駕駛事件，令公眾特別注意到黃司長，未必係好事噃。
我哋成班老友揸車經驗豐富，揸快車冇人唔敢話自己冇，賓架Ｐ有法拉利與波子，知道在北大嶼山係咁意踏吓油門，就會超過限速一百一十公里。追數Ｗ讀書時候已揸快車，專登學過跑車駕駛術，對超速十分明白。我哋成班人都認為，林建岳完全有權為自己辯護，上法庭挑戰警員雷射槍。追數Ｗ話：「雷射槍如果折射到硬物，有可能產生誤差，英國科學研究曾證明雷射槍有誤差，所以有錢打官司嘅話，警方未必贏到官司㗎。以前一架警車泊在路邊影快相，操作成本高過揸枝雷射槍，但快相影到車牌，司機冇法子唔認，而雷射槍係有可能誤中副車嘅喎，隨時射咗前面嗰架，有疑點㗎，有疑點就有官司打啦！」
呢趟好咯，有錢人挑戰警方雷射槍，如果打官司一路打上終審庭，會產生明確案例。本來好好啫，何故警方話按照律政司方面建議，將林建岳之超速指控減低三十五公里呢（由114公里減至 公里），令政府飽受批評呀？打官司唔通政府冇錢咩？與公眾利益何干？如果政府輸了官司，取消雷射槍，恢復警員影快相機制，又有何不可？
左丁山老友崔少明講「黃仁龍的豪賭」，指黃司長慎防仕途止步，崔老兄話：「出身平凡，勤學成材，職業高尚，年輕英俊，態度謙恭，政見溫和，敵人不多……嘅特首料子，竟因民間電台與林建岳事件而自毀聲譽，何其可惜也。」
啲司長局長與名人爭做特首，類似十四匹馬爭打吡大賽，一啲前領馬會腳軟，後上馬會被擠撞，外檔馬唔小心會大波歐，至於不小心墮馬嘅就先後有梁錦松、葉劉淑儀與李國章。有潛質嘅靚馬，要慎防意外呀。