伯南克上任美國聯儲局主席以來，惹來市場評論甚多，然卻貶多過褒。星俠都算認識不少金融界中人，每次閒聊之間言及伯南克，無不對之耍手擰頭。觀看前晚佢發表演說之際，美股跌勢竟立時瘋狂加劇，擺明係大戶做嘢，存心「贈興」，似乎市場對這位阿伯的確有難以言喻的心病。
美股前晚大散超過300點，不少散戶都以為昨日港股肯定「瓜多過菜」，即使跌幅不過千，跌800點收市都冇走雞。豈料股海變化無常，走勢每多出乎群眾想像，港股以25201收市，升86點，大市成交持續高於1200億元。
從走勢分析研判，雖然港股應未跌完，但近日股海淡風肅殺，仍見有資金持續湧進，反映市場買盤動力唔差。星俠認為縱使港股短期未跌定都好，但散戶不宜睇得過淡，若見優質心水愛股價錢吸引，而又有「銀彈」去守的話，可展開買貨行動。不過，要強調的是，上述建議不含窩輪炒作。
內地電訊股硬淨
幾隻內地電訊股，表現相對大市硬淨，早前推介的網通（906）已按擬訂策略買入，僥倖未觸及23元止蝕位，現股價已見回升，仍按原定部署行事。另一隻傳將被「拆骨」的聯通（762），股價在16.5元似覓得支持，惟該股上落波幅大，可候17元水平入市，跌穿15.9元止蝕。