深井葉生推介近期走勢強勁嘅港鐵（066），佢自己喺32蚊已經入咗貨，諗住短炒一個星期博見35蚊，睇好原因：「隻股走勢硬淨，近期個市咁波動佢一樣照升，前景梗係睇好。」
港鐵噚日升咗4.4%，收報32.9蚊。亨達集團研究部董事黃敏碩認同港鐵走勢相當靚仔，「今日仍然企喺10天、20天、50天同250天平均線嘅股票，真係絕無僅有，港鐵就係其中一隻！」
黃敏碩提到，「港鐵公用股得嚟，又有地產概念，仲係香港第二大地主，嚟緊鐵路同地產業務仍然有改善空間，港鐵可視為進可攻、退可守嘅股票。」
不過，黃敏碩對葉生目標一個禮拜見35蚊就有保留，葉生追問：「咁你心目中嘅止賺價係幾多？」黃敏碩就話：「35蚊係有機會去到，只不過可能需要多啲時間。」
主持Teresa都認為港鐵係唔錯嘅投資選擇，「就算一個星期唔到35蚊嘅目標價，再睇3到5個月，贏面亦係非常之大。」
葉先生個案
買入價：$32
目標價：$35
止蝕價：$31
時間：1星期
東亞銀行（023）
次按影響細
大埔關公力撐本地銀行股東亞銀行（023），佢話：「東亞股價仍然落後，近年業務又唔錯，次按問題對佢影響唔大，評級機構都認為50蚊好合理。」關公建議45.5蚊買入，3個月目標價50蚊。東亞噚日收報46.5蚊，升近1%。
黃敏碩讚關公有眼光，「近年東亞北望神州，喺國內開嘅分行比恒生（011）仲要多，西班牙銀行都入股，發展唔錯，預計會係第一批反彈嘅銀行股。」不過，佢提議關公留意多一隻本地薑中銀香港（2388），「佢喺財富管理同按揭業務都做得幾好，加上又係第一個QDII代理行，可作為次選。」
關公個案
買入價：$45.5
目標價：$50
止蝕價：$42
時間：3個月
中鎳資源（2889）
冷敲博績佳
尖沙嘴溫小姐諗住冷敲隻中鎳資源（2889），「有大陸朋友話，每年農曆新年前後，都係大陸不銹鋼廠採購鎳嘅高峯期；仲有報道話因為先前鎳價跌，所以第三季佢停咗賣鎳，但第四季就恢復番，睇佢業績會轉好，所以揀呢隻股。」中鎳噚日收2.69蚊，溫小姐建議等到2蚊先入貨，睇升1倍到4蚊，諗住睇到過咗春節。
黃敏碩話：「隻股啱啱轉型，盈利可以見真章，但要小心呢類股嘅股價未必跟資源價走。另外，佢嘅股價可唔可以翻一番，就有啲保留。建議你，如果隻股真係升，目標價睇2.8至3蚊。」Teresa就質疑：「你想2蚊入，但2蚊呢個位只係喺舊年8．17（大奇迹日）掂過下，呢幾日個市大跌成千點都見唔到，恐防你想2蚊吸貨未必成功。」黃敏碩提議如果溫小姐真係想買，可以考慮2.55蚊小注買入。
溫小姐建議
建議買入價：$2
目標價：$4
止蝕價：$1.5
時間：2個月
創科實業（669）
可收復失地
創科實業（669）噚日大升超過一成，西環David見該股有機會扭轉弱勢，於是大力推介，佢話：「之前呢隻股係咁跌，主要反映美國樓市放緩對佢嘅家居工具產品嘅銷售影響，相信壞影響已反映得七七八八，嚟緊有機會收復失地。」David建議現價買入，揸兩個月，目標價10蚊，睇升14%。創科噚日收8.79蚊，急升12.6%。
黃敏碩有保留：「創科前景仲未明朗，噚日抽升冇乜特別消息支持，以牌面計唔值博！產品主要出口去美國市場，就算之前股價跌到好殘，都冇機構性資金撈底，嗰啲係smartmoney，唔多唔少有啓示，所以股票跌到好殘都唔代表值博。」不過，Teresa補充：「今期《壹週刊》東尼推介過創科，可能係佢今日急升嘅原因。」
David建議
建議買入價：現價$8.79
目標價：$10
止蝕價：$8
時間：2個月
美聯集團（1200）
減息前必炒
美聯集團（1200）話，有個別出色嘅員工，上年出咗40個月糧嘅花紅，北角阿Ben就覺得佢嘅業績認真唔錯，佢話：「每次美國減息前，香港地產股都可以炒一陣。」佢建議𠵱家現價13.2蚊買入，揸兩星期博上15.5蚊。美聯噚日收報13.46蚊，升0.45%。雖然黃敏碩都認同美聯股價企得好硬淨，但就話：「美國減息唔一定次次都會旺地產，不過我都覺得今年樓市交投會幾活躍，對代理有好處。」佢仲笑住話，可發揮地產股窩輪咁嘅效果。
阿Ben建議
建議買入價：$13.2
目標價：$15.5
止蝕價：$12
時間：2星期
中國重汽（3808）
心淡想換馬
黃大仙劉小姐喺12.8蚊時買入中國重汽（3808），此股自舊年11月上市後，一直潛水，噚日收9.11蚊，跌0.55%。劉小姐問：「你話換馬好，抑或守多幾個月好？」黃敏碩話：「呢隻股上市生不逢時，呢幾日都有裂口下跌，見到有投資者不問價沽。其實半新股有貨源歸邊，可以推高，但有重重蟹貨，就有啲令人擔心。隻股未轉勢，你喺九個八至十蚊離場，由弱勢股轉去強勢股，中鐵（390）中長線會好啲。
劉小姐個案
買入價：$12.8
目標價：─
止蝕價：─
時間：3個月
下周一嘉賓：法巴零售衍生產品部董事翁世權
歡迎Phonein28698262
http://finance.appledaily.com
每日收市後4:30pm
想搵名家教路，請登入 http://appledaily.atnext.com/jp/finance登記
成功參與節目者，有機會獲贈禮品，登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
