無綫姐仔楊秀惠早前與孫耀威大鬧緋聞，有傳她入住男方寓所兼以其座駕代步，雖然楊秀惠狂讚孫耀威keep住young兼得人鍾意，樂於助人又nice，奈何人言可畏，無法不避忌，她苦笑已被指黐車黐樓，「費事俾人話我黐身黐勢」說她一味靠黐，她才真的黐總掣！
現年23歲的楊秀惠與比她年長12年的孫耀威，早前因合作拍攝音樂電影而撻着，有傳女方火速遷進孫耀威的何文田寓所，又坐他的寶馬座駕代步，故一時指她被包養，一時又說她一味靠黐，句句閒言頂心頂肺。
不過楊秀惠對孫耀威確具好感，日前她在中環接受訪問時，便對孫耀威讚不絕口說：「佢係keep住young，唔係古板嘅人，對身邊每一個人都好，包括我嘅女化妝師都覺得佢好nice、好細心、好體貼，好鍾意孫耀威呀，佢係好得人鍾意，但我只係鍾意同佢做friend。」
「想有人攬住」
楊秀惠直言以前確恨拍拖，但現在已想法不同，她說：「有時候好悶、唔開心，係想有個人攬住，但親友都可以做到呢樣嘢，好似胡定欣，佢係我最好嘅姊妹，有次我哋唔開心飲酒，佢返到屋企已經醉咗，係我幫佢換衫。」若孫耀威醉了，楊秀惠又會否幫他換衫？她即笑說：「我哋未去到大家想像中咁close嘅關係，同TVB其他朋友一樣，唱吓卡拉ok、食吓飯，但未去到做乜事都要同佢交代嘅朋友，佢係好nice嘅人，佢係基督徒，會好願意幫人。」
自從傳緋聞後，楊秀惠感受人言可畏，尤其指她靠黐，更是叫她反感。「傾得埋又俾人炒作，費事俾人話我黐身黐勢，已經俾人話黐樓黐車啦，女仔都要有堅持，唔係靠呢啲嘅。」
「我冇做錯事」
楊秀惠又強調自己跟朋友合租新屋，搬竇後才知孫耀威是鄰居，她說：「之前我真係唔知佢住喺度，上次影到我坐佢架車，係因為大家一齊去睇片，佢知我冇揸車，順便車埋啫。有段時間我唔開心，都有問過媽咪，我係咪要搬走呢？但我冇做錯事，點解要搬呢？做乜啲人會諗到咁複雜，講到大家有嘢？我行得正企得正，佢係我嘅好朋友，未來有冇機會，我唔知啦。」
採訪：朱倬誼 攝影：林德雄
化妝：MiuFung@beautytech
髮型：YukiChan@beautytech
場地：Baci 服裝提供：SistyrMoon
