是但＝求其？
如果打工仔做事是是但但、求求其其，得到的下場輕則被老闆罵個狗血淋頭，重則炒魷。
但近幾年有一位仁兄是但噏、求其唱都可賺到盤滿缽滿，由伊館到會展到紅館，還場場爆滿。
這個人是但說句「多晒」，求其講句「超低能勁搞笑」便可成為金句，被製為電話鈴聲。
是但＋求其＝「是但噏，求其大合唱」？
又來噴口水了，有請林海峰！
撰文：李珮洳
林海峰（Jan）將於下月25至28日在紅館舉行四場「芝華士林海峰是但噏求其大合唱」講唱會，一個平時不喜歡說話的人偏偏喜歡做唱片、享受獨自在台上開talk騷，世事往往充滿矛盾。阿Jan一向甚少公開提及家人，第一次開talk騷時罕有提及與太太彭羚、兩個囡囡的生活細節。今次阿Jan有否想過再將家人牽涉在內，他帶點疑惑的說：「我真係唔係好明，點解啲人對我屋企咁有興趣呢？我未知今次會唔會講呢個話題。如果大家咁想知，我答大家可能會有，咁我引咗你哋入局先，唔係你要乜我就餵乜，入到嚟我咪畀第二啲嘢你囉。」
夫妻少談公事
為了配合講唱會，阿Jan同時推出新碟，大碟內有一首歌叫《儍婆》，單看歌詞還以為是他冧老婆之作，皆因歌詞寫道：「儍婆點解你仲要去忍我，仲會𠱁番我，換轉我即刻扯晒火。儍婆點解你仲要去跟我，成世要跟我，換轉我轉個身早撇咗。夏季就靚女多，貪高興玩過，就算我係闖禍，你當冇睇到聽過。做嘢做到冧咗，即使跌低過，係你為我嚟唱首溫馨K歌。」阿Jan解釋這首歌絕不是送給太太，只是藉此以明鬧暗讚的方式歌頌身邊的女性，他說：「人人睇完呢首歌啲歌詞都以為我寫畀老婆，絕對冇咁嘅事，我係想講我生活、工作上周圍都有好多女性，佢哋主宰咗好多重要事，當中包括有上司、同事、屋企人、女fans，甚至幫我化妝嘅都係女性，所以我先寫一隻歌講佢哋，表面上睇就好似鬧緊呢班儍婆，事實上我係歌頌緊佢哋，我唔想再唱嗰首禁歌《只因喜歡你》喇。」
提起彭羚，記者打蛇隨棍上再多問幾條問題，阿Jan卻抵死地以「我有我嘅生活，佢有佢嘅忙碌」來交代與太太的關係，他說：「《儍婆》呢首歌我冇畀佢聽過，歌詞佢都冇睇過，我好耐冇將工作同佢分享，只係以前拍拖初期佢仲喺呢行，我會將叱咤啲稿講畀佢聽吓，𠵱家真係好少機會喺屋企提及公事。」
避看自己表演
多年來，商台叱咤頒獎禮中的焦點，除了是男女歌手獎花落誰家以及誰哭得比誰大聲外，阿Jan短短10多分鐘的棟篤笑也甚具娛樂性。在剛過去的1月1日頒獎禮上，阿Jan將歌手的走勢以抽新股和窩輪作比喻，可惜台下反應麻麻，到他完成表演，台下才有反應，是比預期來遲了。對此阿Jan覺得今次是新嘗試，其實寫完稿後，林夕也曾作出忠告，他說：「林夕有同我講過現場嘅觀眾層比較細，佢哋未必聽得明我講啲乜，佢哋喺窩輪個位識得笑，全因為由茄輪呢個話題引起佢哋嘅興趣，我都有預計到今年嘅反應唔似以往咁樣，但係我想博我想試，總之所有嘢都係盡做啦，之後就可以安心上路喇。」
阿Jan又表示做talk騷是個長線投資，等於他在叱咤選取比較冷門的話題，觀眾未必有即時反應，但不可以抹煞之後的可能性，他以陳奕迅（Eason）和黃子華的表演說起，並說：「你睇Eason同子華個騷，現場睇一次，到出碟之後睇多次，你get到嘅嘢係唔同㗎，有啲嘢喺現場你未必會笑，到睇碟時你就會覺得好正，呢啲就係要博嘅長線投資。」阿Jan指至今都沒有翻看自己的演出，就算電視台播映，他會查清楚播出時間，盡量避免轉台時看到。
愛做騷有自由
相信上年林海峰最令人難忘的，就是被拍到在海邊小解。問他會否將此事在talk騷中重提，他反問記者：「你仲記得咩？我之前做訪問都有人話記唔起呢件事啦，我都未知會唔會講，可能會攞出嚟講一兩分鐘啦。」經過林海峰之前的兩個talk騷，市面上有一個後遺症，第一次talk騷後街上很多人講「多晒」，第二次就不停有人說「超低能勁搞笑」，甚至有人將之剪輯成電話鈴聲，阿Jan說：「如果我早知呢啲說話可以變成一門生意做電話鈴聲，我一早就叫公司做，自己賺埋呢筆啦。」其實工作以外的阿Jan不愛說話，就連接受訪問時例牌開場白都是「吓，要我講乜呀？我冇嘢講㗎喎。」偏偏阿Jan就最愛talk騷及出唱片，因他覺得這兩項工作給他最大的自由度，他非常享受當中創作過程，以及一個人在台上用一支咪表演，從中得到的滿足感難以形容。
拒入場唔老利
潮人也有迷信八卦的一面，問阿Jan開騷最怕遇到甚麼難題，他居然回答是最怕保母車不能進入表演場地，他指這是他多年來的一個宿命，他說：「我都唔知點解次次做人哋演唱會嘉賓又好，做記者會又好，就連啱啱做叱咤綵排都好，不論會展、九展同博覽館都話我架保母車冇登記唔畀我入，作為一個artist，呢個好似係一個signal話畀你知呢度你未夠班入嚟呀，我都會諗係咪我唔夠勁呢？次次都係咁好唔老利㗎嘛。」
最後談到宣傳海報被指抄襲畫家岳敏君的作品，阿Jan表示岳敏君的畫近年的流行程度就如毛澤東的肖像處處可見，他說：「我呢幅又唔係畫又唔係用嚟賣，我用呢個擘大口笑嘅形象就好似去萬聖節party你總有一個角色想扮，有人扮白雪公主有人扮鬼一樣咋嘛。」
「今次冇帽冇tee啦」
早前林海峰在記者會上舉辦了「我最最最最最最最最最最的林海峰表演項目」投票，當中項目包括「現場演繹電燈膽」、「台上行雷閃電俾雷劈」、「反轉舞台Part3」、「補發多個大獎予Paco」及「全場免費派發紀念Tee紀念帽」等，最後以派帽派tee一項大比數勝出。
「唔想咁濫」
事實上，每次阿Jan開騷所推出的紀念品必會掀起fans搶購。雖然以往阿Jan推出的產品眾多，若要買齊全套價錢絕不便宜，但多數人都是抱着又要鬧又要買的心態搶購。阿Jan透露今次talk騷只會推出少量，款式比之前為少，他說：「我本來諗咗好多款，做又做咗好多，但結果出到嚟我又唔想出咁多，因為做嘅過程我連自己都唔覺得興奮，唔想件事變得咁濫，總之今次冇帽冇tee啦。」阿Jan指身邊的拍檔都叫他出多些產品，他們的解釋是「你唔興奮但係啲人想要呀嘛。」不過阿Jan最後的堅持是：「我做嘢都要令自己興奮，我唔想好似做填充咁，求其填滿啲格仔就算。」
《儍婆》
作曲：陳奐仁 填詞：林海峰
全世界有邊一個最儍 儍就我要請佢吔燒鵝 儍婆
望見就佛有火 啲單寄畀我 就有賴你幫助 似個秘書包搞妥
話肚餓就有call 即刻餵飽我 夜半賀我一賀 嚟碟餸跟湯老火
落雨仲去踢波 波衫臭得我 就似毒氣災禍 你冇計點都攬我
做到攰就有火 邊位按摩我 全靠係你用對手咪咪嚤嚤
好 老細我放工 我約晒老友去放鬆
好 放到我過晒鐘 冇嘢攝攝你半個鐘
我叫你到你實出嚟 喂你冇嘢你畫乜眉
你有肚腩我要你減肥 次次借你嚟去出氣
儍婆 點解你仲要去忍我 仲會𠱁番我 換轉我即刻扯晒火
儍婆 點解你仲要去跟我 成世要跟我 換轉我轉個身早撇咗
夏季就靚女多 貪高興玩過 就算係我闖禍 你當冇睇到聽過
做嘢做到冧咗 即使跌低過 係你為我嚟唱首溫馨K歌
好 你有你發功 最怕你唱到喊到腫
我冇錫到你燶 冇買嘢送過你 送個風
次次你嗌要食曲奇 我嗌老細叫碟蘇眉
當你冇到 我係揸旗 冇𠱁過你仲成日激你
儍婆 點解你仲要去忍我 仲會𠱁番我 換轉我即刻扯晒火
儍婆 點解你仲要去跟我 成世要跟我 換轉我轉個身早撇咗
全世界有邊個最儍唔及你一個
儍嘅我要請你吔燒鵝
儍婆 點解你儍到咁鬼錯 成世冇好過 全世界醫生都怕咗
儍婆 千億個就愛你一個 係我最識貨 就算我知你short咗
儍婆 呢一心就要你一個 儍嘅襯番我 儍到敢伸手畀我拖
儍婆 聽聽吓又要喊乜喎 儍嘅喊乜喎 儍到你咁喊一餐瞓咗