人大小圈子選舉下星期投票，民協馮檢基當選機會渺茫，不過好有體育精神，喺老巢深水埗「拉票」，噚日去到北河街街市出面，諮詢市民對佢參選人大有乜意見，又做問卷調查，了解市民最希望人大做乜。
人大選舉得千幾人有份投票，一般市民得個睇字，基哥落區做宣傳，形同向空氣拉票，似係做畀人睇多啲。呢啲有中國特色「選舉」，拉票唔使落區上街嘅，中華總商會有267票，係真正「大票倉」，噚日安排選委同30幾個候選人見面，大家閂埋門傾掂就得啦，使乜拋頭露面先？會後中總發出新聞稿兼相片，其中一張相係王如登、范太、羅范同葉國謙合照，中總心水人選，一眼睇晒。