AC米蘭喺意盃出局，唔意外，最意外係加度素歇冬後復出13分鐘就鏟人做「紅牌阿姑」。話說加度素歇冬時唔唞，特登飛去蘇格蘭跟母會格流操練儲住團火蓄勢待發，爆就爆啦，但就真係火爆。球員嗰團火，可以用喺好多方面，鬥牛㹴顯然用錯地方。
入替13分鐘即出場
前晚AC作客對卡坦尼亞，加度素下半場21分鐘後備落場，無幾耐AC就由柏路斯治扳平，之後主隊仲有索廸被逐，當時AC形勢大好，隨時追平「大分」（當時1:1，兩回合計落後2:3）。加度素因停賽錯過禮拜日AC大炒拿玻里，睇住隊友開心，聯賽主場開齋自己冇份；可能因為咁，佢前晚一落場就好躁，13分鐘後就兜口兜面鏟跌基高莫泰廸斯高，兩黃變一紅，就係咁，AC冇咗以眾凌寡優勢，和波出局。
包括我求大俠在內，好多人都欣賞鬥牛㹴嘅鬥心，但上個禮拜過咗30歲牛一嘅佢，近兩年狀態下滑，怕且唔可以吓吓靠衝靠撞，佢將來想同大紅人卡卡爭做隊長，更加要收吓火。講開卡卡，佢細佬廸加奧前晚又多甩漏，俾人笑龍兄鼠弟，多得個鑊由加度素孭晒，佢至有得落台。
羅馬呢邊 托廸威晒
同人唔同命，托廸帶領嘅羅馬就喺意盃勝拖連奴4:0（兩回合計反勝5:3），據講近年因傷，對腳鑲咗10粒鐵釘撐住嘅托廸，亦喺下半場中段落場，無幾耐隊波即刻打破悶局，而托廸亦梅開二度，射入佢效力羅馬第200球。兩隊大將落場後嘅唔同表現，正好決定咗羅馬晉級、AC出局嘅命運囉。
羅馬係當日少數喺盃賽晉級嘅名牌球隊，好似皇馬、里昂同阿積士都落馬，不過呢幾隊波專心爭聯賽，無咗盃仔，焉知非福。