香港電子傳媒競爭激烈，新聞小花大戰由香港打到北京，八方噚日收到「北風」，「上面」消息透露，噚日發生咗一單新聞小花「爭仔」事件，男主角係正訪華嘅英國首相白高敦（GordonBrown），關鍵人物係鳳凰衛視美眉記者秦楓。
話說噚日白高敦同溫總去人民大學同學生交流，傾完偈後睇青少年打乒乓波，外交部按慣例安排幾個電視台記者代表入場採訪，行內術語係「做pool」，行規係拍到嘅片段同錄音唔可以獨食，要公開畀其他記者採用，即是所謂「駁料」。
噚日做代表入場拍攝嘅係鳳凰攝影師，採訪完畢，秦楓話要趕報新聞出街，即刻擸起盒錄影帶想走人，其他行家未翻錄「駁料」，梗係唔畀佢咁做，否則咪變成鳳凰獨家新聞？now新聞小花蔡展翔好勞氣，有行家要求外交部新聞官介入，甚至驚動全國記協要求佢放低盒帶，ATV小花余安琪想做和事老都無功而還。
成班新聞小花眼白白睇住秦楓揚長而去，激到眼紅紅，在場者稱真係我見猶憐。據講秦楓用完盒錄影帶，兩個鐘頭後交出畀行家翻錄。
秦楓咁把炮擺出阿姐姿態力壓眾小花，皆因佢後台勁硬，小花們只能怨自己條命生得冇人咁正，唔「恨」得咁多。
原來係李肇星姪女
據講秦楓係已退休嘅前外交部部長李肇星姪女，李在位時，秦楓喺外交部出入自如，見到幹部就嗌叔叔、嬸嬸，李肇星對呢位世姪女都另眼相看，記者會前後，兩人有時會行埋一邊密斟，至於係咪有猛料畀佢就唔知嘞。李肇星𠵱家係南開大學教授，雖然人走茶凉，但秦楓早前建立嘅人脈，仍然用得着。
認識秦楓嘅人同八方講，秦楓係北京名大學畢業，曾放洋幾年，回國後加入鳳凰做記者，由於佢係高幹子弟兼有先天優勢，所以上司多數派佢做外交新聞。秦楓雖然未算明星級記者、主播，不過都有唔少fans，八方喺網上發現佢幾受網民歡迎，有人喺佢個blog留言，開門見山問佢結咗婚未，有人單刀直入問佢攞MSN同QQ，最出位係有個電車男，話秦楓似自己初戀女朋友，超搞笑。
做新聞分秒必爭，個個記者都想做獨家新聞，秦楓咁搏命八方可以理解，不過家家有求，一眾新聞小花如何反擊，下回分解。