港股噚日初步試底，市勢亦大幅波動，最淡之時，恒指跌穿24000點大關，落到23957，大跌近500點，但由於累積跌幅極大，終出現大幅反彈，升番成1400點，收市守穩25000大關之上，報25114，升664點，但期指輕微低水。
大市回升，暫時只能以反彈視之，前日的大型下跌裂口（25823至25131）已補回部份，唔排除會全部補回，但26000點關口會有好大阻力，大市反彈後會再試底，甚至可能會跌穿噚日嘅低位，試一試250日線（23449）支持，才正式完成今次中期調整。
短線博反彈，恒指雖然預期只有3至4個巴仙升幅，但個別股份嘅升幅會大好多，特別係跌得多嘅中資同國企股，就以早輪推介過嘅建設銀行（939）為例，噚日最低價5.64元，午後曾經彈上6.17元，升幅9.4%，尾市略回，收6.04元。
招行信行發盈喜
去年10月，建行曾高見9元，噚日的5.64元雖然未能確認係底，但跌幅大，反彈的幅度亦會好可觀，睇勢可以上番50日線（7.02元）水平。若以反彈前跌幅的0.382計，上升目標係6.92元。
大行多看好六行前景，招商銀行（3968）和中信銀行（998）都發出盈喜，其他銀行去年盤數相信亦係靚爆鏡。中國銀行（3988）噚日已好強勢，大市急挫之時，都能守穩前收市的3.31元而不跌，午後回升，收3.44元，升3.9%。中行現時股價已係落番06年下半年水平，好吸引。
次按風險已不大
去年11月初，中行股價高見5.27元，近日低位3.30元，跌咗37.3%，50日線在4元水平，有機會上番去，保守估計反彈前跌幅的0.382，上升目標係4.05元。
中行有美國次按嘅「包袱」，但已作出撥備，行方認為風險已不大，07年度（12月年結）首三季盈利達454億元，升40%，每股盈利18仙，升28.5%，估計全年每股盈利25仙，以反彈目標4元計，PE亦只係16倍，仲係好吸引。