近日又再有多隻新股進行招股，不過遇上大跌市，招股價相信好難好似舊年咁進取。據報載，計劃下周一招股的陽光能源（757），公司將招股價範圍減價約10%，由原本4.57至5.38元，下調至4.08至4.88元。至於昨日正式招股的茂業國際（848）、新福港（301）及昌盛中國（1863）則仍維持原來招股價。
陽光能源減價後，按截至07年底止的預測盈利計，其預測PE將降至22.2至26.6倍，集資規模將減到17.26億至20.64億元。陽光係內地太陽能晶圓生產商，香港暫時只得華基光電（155）有得比較，惟華基未有PE可比，所以降低招股價後，仍然好難估佢係平定貴。
其他三隻，茂業為百貨股，在內地經營15家百貨店，同時兼營地產開發，旗下有隻A股成商，茂業招股PE為30至39倍，以新世界百貨（825）作比較，其07年度收益升31%至9.82億元，純利升91.8%至3.03億元，撇除特殊收益，股東應佔溢利增加55%至2.45億元，往績核心PE約為68倍，由於有新收購，假設08年盈利倍升，可降至30倍。以近期半新零售股百麗（1880）等股份計，平均往績PE都60倍過外，由於各有經營長處，直接比較有欠公平，若以中間價招股，認購茂業應該都唔使點輸錢。
基建股新福港無大行照住，保薦人工商東亞往績一般，據初步國際配售反應唔算差，沒有抽飛情況。由於集資規模僅10零億銀，同時預測PE僅10.5至14.1倍，呢隻算係冇咁易穿底嘅新股。
有華資行唔提供孖展
至於內房股昌盛，雖然佢係由嘉誠保薦，惟由於內房股氣氛實在太差，完全諗唔到有認購之理由。事實上，上述4隻新股中，某間華資行4隻都唔提供孖展認購，可見氣氛如何，唔認都應該無乜損失。
歐陽風