高等法院上訴法庭副庭長胡國興，噚日以截取通訊及監察事務專員身份，喺政府新聞處同立法會議員簡報截取通訊06年年報內容。胡官做專員後平時唔使審案，佢話為了解執法人員「勾線」程序，有時會微服出巡實地視察，由於佢不時喺新聞曝光，可能有人認得佢，所以要暗中行事，多數喺晚黑出動，否則會累執法人員暴露行蹤。議員卿姐講笑問佢，出巡視察有冇喬裝易服戴假髮。
點解議員要去新聞處開會呢？因為胡官強調自己身為法官，必須維護司法機構獨立形象，基於三權分立原則，所以絕對唔可以去立法會向議員做滙報，否則即係開壞先例云云。
維護法官超然形象
佢更理直氣壯咁講，自己做咗選管會主席13年，都從未去過立法會開會，原因一樣，就係要維護法官超然形象，佢希望議員理解佢嘅苦衷，又話噚日會議有記者在場，應該有足夠透明度。
為咗維護胡官「樽鹽」（尊嚴），新聞處特別將一個記者會場地改裝成「A貨」立法會會議室，議員移船就磡，同胡官「扮」喺立法會開會，記者坐埋一邊旁聽。