雖然話女人錢易賺，但近排減肥藥事件，令到好多纖體公司老闆好頭痕，好似修身堂（8200）老闆張玉珊就咬牙切齒上晒雜誌封面澄清。纖體療程難sell，但用喺塊面度嘅嘢就唔慳得，所以賣化粧品嘅仍然風光，睇吓噚日股市風高浪急，但莎莎（178）、卓悅（653），同代理~H2O+產品嘅奧思（1161）股價全部升就知。奧思仲升成14%，原因係噚日派成績表，07年度純利增長兩倍兼派特別息。公司交到成績，行政總裁余麗絲總算可以輕鬆吓，喺公司搞咗個FunkyDance興趣班幫同事減壓。
余麗絲話，做寫字樓嘅同事成日坐，唔多運動，所以搞個FunkyDance興趣班，等大家郁多啲，健康之餘仲可以減壓。聽講，呢個班一話開，同事即刻踴躍參加，40個名額好快就爆，雖然佢哋公司女同事多，但都有兩位男同事報咗名。
呢期興玩Pilates
公司搞興趣班，諗到FunkyDance都算另類，原來余麗絲本身好鍾意做健身，亦好鍾意試新嘢，今次搞FunkyDance都係想一班同事做多啲運動，開心啲，佢都會一齊上堂玩埋一份咁話。
不過，FunkyDance佢唔係成日玩，呢排玩緊嘅係Pilates，一種近年好流行嘅運動，類似瑜伽加體操嘅新興運動，特別適合OL，睇嚟余麗絲好注重健康，而且仲好貼潮流。
電郵：mailto:[email protected]