現年19歲的動漫Maggie（李曼筠），憑34D、25、36驕人身材於06年動漫節一炮而紅，隨後更殺入模界成為商場搶手貨，不過靠身材搵食的她，最近卻表示為進軍樂壇而收起性感。前晚她出席《蘋果》網站的直播節目《娛樂開CHAT》時，除了與主持王友良及fans對話，解答他們的疑問外，更透露曾有縮胸念頭，因她擔心大家將視線過於投放在其身材上。
動漫Maggie於節目中大談擇偶條件，並率先向觀眾展示她最近鑽研的魔術，希望在稍後推出唱片的宣傳中透過魔術和fans互動。席間，紅磡Alan與動漫Maggie聊天時感動到喊，並表示「一生一世，全心全意擁護Maggie」，結果這情深承諾，令動漫Maggie感動得眼泛淚光，並選他為整晚表現最好的觀眾，獲得由她挑選的豐富禮品。大家可登入《蘋果》網站隨時重溫節目。採訪：林惠卿 攝影：陳慧安
想開舖兼出書 西環Ricky
Ricky：我想問你細個有乜嘢志願，你未入行之前有冇諗過自己會做啲乜嘢工作？
Maggie：細個最想做老師，但大個最想擁有屬於自己嘅舖頭，間舖頭除咗係cafe，有個位賣一啲自己鍾意嘅嘢，例如衫或者自己DIY飾物！我仲想出書，希望大家可以喺我啲文字上了解多啲唔同嘅Maggie。
Ricky：將來你有機會接演反派或醜陋角色，驚唔驚影響形象而唔接？
Maggie：唔驚，其實我好想演啲好惡好粗魯嘅角色，因為好惡好粗魯嘅女仔同我係完全相反性格，如果可以喺戲入面鬧人同好粗魯動作，係好開心同興奮！
𠱁一句瞓唔着 紅磡Alan
Alan：入行以來最難忘係乜嘢事呢？
Maggie：最難忘係好開心身邊有咁多人支持我，我拍電影唔多，歌又未出，但身邊有好多人支持，可能只係講一句說話：「我哋會支持你㗎，Maggie。」我就會開心到成晚都瞓唔着，好感動你哋一路支持我，希望你哋可以一路支持我直到永遠。
Alan：由Maggie出道以來我就已經好鍾意，所有Maggie嘅活動我嘅出席率係100%。
王友良：你鍾意Maggie邊方面，令你出席Maggie所有活動？
Alan：我覺得佢好真，同埋記性好好，佢會記得晒我哋成班fans嘅嘢。所以我想同Maggie講：「我哋所有fans都會一生一世，同埋全心全意咁擁護你。」
性感只限工作 九龍塘Bob
Bob：你嘅身材好好，讀書時有冇因身材豐滿而俾人過度focus或者遇到啲尷尬事？
Maggie：其實又冇，因為除咗做嘢可能會有少少性感外，我平時都係T恤牛仔褲，我係一個好怕凍嘅人，所以平時都包到好密實。
Bob：我見Maggie你日日都有寫blog，你做嘢咁忙，係乜嘢令你堅持日日都寫呢？
Maggie：其實我寫咗blog已經有4年，我覺得呢個係一個好好嘅習慣囉！因為我𠵱家睇番以前自己寫嘅嘢，可以睇到自己係慢慢咁轉變，睇得出自己大個女。
學魔術谷唱片 土瓜灣小叮
小叮：如果你出唱片，你會用乜嘢別開生面的方式嚟做宣傳？
Maggie：我𠵱家學緊魔術，因為啱啱學，只係識一啲簡單嘅魔術，但遲啲我會學啲更複雜嘅魔術，希望可以喺宣傳時候加插一啲魔術同觀眾玩，等大家知道我識魔術，之後叫我做「MagicMaggie」！
小叮：假如你識一種魔法可以幫你做任何事，你會用來達成乜嘢心願呢？
Maggie：我當然希望心想事成，哈哈…！我想全世界所有人都開開心心同健康，因為我覺得就算你有幾多錢都好，但唔開心都冇乜意思，所以最緊要係開心同健康。
Freeze下周等你Chat
《娛樂開CHAT》第二集請來性感女子組合Freeze擔任嘉賓，若想一睹三女的真我個性，請於1月23日（下周三）6:00pm登入 http://ent.appledaily.com即可，節目於當晚7:00pm在《蘋果》網站直播。
