持有蟹貨中國中材（1893）嘅將軍澳梁小姐好擔心問：「喺10.8蚊位高追咗隻中材，佔咗自己個人資產三分一，喺咁嘅市況，究竟仲可唔可以揸落去，係咪佢基本因素唔掂或者變咗？」中材噚日下挫7.3%，收報8.11蚊，相對梁小姐嘅買入價，跌咗25%。佢仲呻話，呢幾日跌市，已經唔見咗舊年一半利潤。
英皇證券研究部主管沈振盈話：「中材業務仲有前景，但PE唔算低，尤其早排半新股係咁俾人炒上，可能係有人借冧市前，短炒投機，半新股短期面對唔少沽壓，喺咁嘅市況，我就一定唔會再守。」
現十字星有機反彈
梁小姐問：「咁係咪賣咗佢，買番啲合理股價嘅股票？」沈振盈話：「你要睇乜嘢時間同乜嘢位換馬，揸現金短炒，一、兩日計數，啱位同唔啱位都要走，千祈唔好黐身。」
梁小姐再問：「中材都跌咗咁多日，會唔會有機會反彈，唔使蝕咁多？」沈振盈話：「要博一博，今日中材嘅形勢好少少，出現咗十字星，好似有機會反彈，但唔好期望太高，可能會俟近9蚊邊。」
輸咗舊年一半利潤
孫柏文好奇問：「梁小姐，你炒咗股票幾耐？」梁小姐語氣帶點無奈話：「炒咗好耐啦，03年開始玩股票，不過呢幾日已經蝕番晒上年賺嘅一半錢。」
沈振盈話：「你經歷過升浪，但就未試過跌市。」
梁小姐呻：「上個禮拜都仲好地地，點都估唔到幾日就輸咗上年賺嘅一半。」沈振盈安慰：「你算好㗎啦，其實有唔少投資者已經輸入肉，你冇跌市嘅經歷，我建議你可以小注買入，感受一下跌市嘅威力，當係一個投資經驗。」
中國電信（728）
相對強勢 加注唔使急
跑馬地陳先生早前打過嚟推介中國電信（728），嗰陣建議入貨，主要係炒大陸電訊重組及3G概念。事實上，陳先生喺7蚊已經沽咗啲貨，6.25蚊又入番少少。佢仲話：「雖然港股大跌超過半成，但中電信只係微跌不足1個巴仙。」陳生對呢隻股充滿信心，想趁跌市溝貨，降低成本價。中電信噚日收6.11蚊，跌6仙或0.97%。
沈振盈話：「呢隻係我嘅愛股之一，如果個市反彈，佢會彈得好快，中電信近期相對強勢；佢𠵱家PE只有十零倍，絕對唔貴，就算冇3G，佢嘅盈利都唔會縮，就算跟住個市跌，相信都唔會跌得太過份，佢6蚊個位都幾穩，你可以留住啲彈藥先。不過，溝貨唔使咁急做決定，最緊要睇大氣候。」
沈振盈建議佢喺5至5.5蚊先好溝貨，但千祈唔好博到要贏盡。
港交所（388）
下試250天線 勿溝貨
黃大仙劉小姐提到港交所（388），原來佢喺226蚊入咗貨，但港交所噚日再急跌12.9蚊，收報172蚊，跌幅7%，短短3個交易日下挫近一成六，搞到佢好不知所措：「沈大師，港交所家吓跌咁多，好唔好溝貨？」
沈振盈話：「早排我已經喺專欄度響晒鑼，叫好走貨，乜你唔聽呀！千祈唔好再溝貨，止蝕位都唔喺呢個時候定。」劉小姐話：「佢跌得咁急，點走啫。」沈振盈解釋：「睇番個走勢，港所交有機會跌到250天線，先至反彈，即143蚊左右，其實不嬲都覺得港交所貴，成100倍PE，都係俾港府入股先至升得咁多。要去番200蚊，3個月就冇可能㗎啦！半年都有機會上番190蚊嘅。」
中國中鐵（390）
60倍PE仲係貴
方太睇好舊年12月先上市嘅半新股中國中鐵（390），建議9蚊買入，睇長線，佢話：「今日股市跌咗咁多，話晒中鐵都係基建股龍頭，將來有好大potential（潛力），可考慮趁低位撈貨。」中鐵股價噚日跟隨大市下滑，一度急挫9.2%，最後收報9.5蚊，跌幅收窄至5.2%。
沈振盈唔主張方太咁快就撈貨，「中鐵嘅PE（市盈率）都仲有60幾倍，幾好都假啦！可以再等吓先至入。呢幾年嘅投資者唔理PE，隨便亂買，喺大牛市時，呢啲股票當然有機會升啦，但當落番熊市時，PE高嘅股票可以跌得好急㗎，要識睇位走。」
-方太建議-
建議買入價：$9 目標價：－
止蝕價：－ 時間：長線
中交建（1800）
應該仲有水位
噚日大跌市，一早已經清晒倉嘅大埔關公，打上嚟推介中國交通建設（1800），佢話現價都買得過，揸半年，目標價22蚊，睇升15%，仲建議大家可以小敲博一博。「呢隻股表現好強勁，同250天平均線15.36蚊，仲有一段距離。」中交建噚日收20.25蚊，跌7.1%，最低都係見20.05蚊，20蚊關口算係硬淨。
沈振盈話：「唔係太重貨喺手，買少少玩吓無傷大雅，中交建喺20蚊造咗幾個底，應該有3、4蚊水位走，短炒可以睇23至24蚊，不過如果跌穿18蚊就好弊，到時一定要手起刀落止蝕！𠵱家個市啲沽盤輪住嚟，唔知中交建嘅沽盤幾時殺到。」
-關公建議-
建議買入價：$19.2 目標價：$22
止蝕價：$18 時間：半年
株洲南車（3898）
短線難返家鄉
元朗黃先生喺15蚊入咗株洲南車時代（3898），佢話：「諗住短炒，點知坐艇，𠵱家跌到去10蚊邊，止蝕都冇乜意思，想問吓長揸有冇機會返家鄉。」
沈振盈話：「南車上次見10蚊，係舊年8月大跌市嗰時，𠵱家跌到落嚟呢啲位，絕對有權反彈，不過今次跌市同8月嗰陣唔同，當時急跌後反彈，今次係一浪低於一浪咁向下走。首先要搞清楚𠵱家局勢，係講緊冇錢入兼抽水走人，短線未必可以返到家鄉。」
孫柏文認為：「論公司質素，南車其實幾好，不過𠵱家問題係個市太弱，幾好質素都冇用。」沈振盈亦認同咁話：「如果你肯放埋一邊等三五七年，絕對冇問題。」
南車時代噚日收報10.2蚊，跌7.4%，較舊年10月高位15.82蚊，累跌達36%。
-黃先生個案-
建議買入價：$15 目標價：－
止蝕價：－ 時間：等到公佈業績
今日嘉賓：敦沛金融投資研究部主管郭家耀
每日收市後4:30pm
歡迎Phonein28698262
http://finance.appledaily.com
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
