美國花旗集團受次按危機拖累，需要撥備成1400億銀，搞到上季虧蝕成767億銀，喺《香港討論區》，唔少網友熱烘烘討論，網友PKK趁機煽風點火，佢話：「我決定唔還卡數畀花旗，橫掂佢都有咁多壞賬，唔爭在加埋我嗰筆啦！」aannddyy123即刻好抵死咁講：「啱啱申請咗張花旗卡，等我碌多啲先。」yatw仲激：「既然都諗住唔還，一於碌爆張卡先。」khlam620再加把火：「如果花旗執埋笠，仲唔使還㖭！」
世事邊有咁着數，Sam_tkt提醒：「唔還錢，花旗仲多謝你㖭！利息慢慢同你計。」Johnlaw08話：「照計佢𠵱家等錢使，隨時發窮惡都似，唔還嘅話，煩都煩死你。」Sorryguys亦話：「大家唔好咁儍啦！花旗執笠，佢嘅資產會俾人接手，唔係唔使還。」